මොරටුව පොලීසිය අසල උණුසුම් තත්ත්වයක්

මොරටුව පොලීසිය ඉදිරිපිට ඊයේ(19) රාත්‍රියේ උණුසුම් තත්ත්වයක් ඇතිව තිබේ.

ගම්වාසීන් කිහිපදෙනෙකු අත්අඩංගුවට ගැනීමට විරෝධය පළ කරමින් 100කට අධික පිරිසක් මොරටුව පොලීසිය ඉදිරිපිටට පැමිණ විරෝධාවයක නිරත වීම හේතුවෙන් මෙම උණුසුම් තත්වය හට ගෙන තිබේ.

මොරටුව පොලිසිය සඳහන් කළේ මොරටුව ප්‍රදේශයේ දේවස්ථානයක් ඉදිරිපිට නිර්මාණය කරමින් තිබූ තොරණක් හේතුවෙන් එහි සිටි පිරිසක් මාර්ගයට අවහිරවන ලෙස රැඳී සිටි බවයි.

ඒ හේතුවෙන් ඔවුන්ව ඉන් ඉවත්කිරීමට රථ වාහන අංශයේ පොලිස් නිලධාරීන් කටයුතු කිරීමේදී පිරිසක් ඊට බාධා කළ බවයි.

එහිදී පොලිස් නිලධාරීන් දෙදෙනෙකු පහරකෑමකට ලක්ව ඇති අතර, එම නිලධාරීන් මේ වනවිට පානදුර රෝහලේ ප්‍රතිකාර ලබන බව පොලීසිය වැඩිදුරටත් පැවසීය.

එම පහරදීම හා ඇති වූ තත්ත්වය මත රාජකාරියට බාධා කළ බව පවසමින් මොරටුව පොලීසිය විසින් මේ වනවිට පුද්ගලයන් 5 දෙනෙකු අත්අඩංගුවට ගෙන ඇත.

මෙම අත්අඩංගුවට ගැනීමට විරෝධය පලකරමින් ප්‍රදේශවාසින් මෙලෙස මොරටුව පොලීසිය අසලට පැමිණ ඇත.

මෙම තත්ත්වය පාලනය කිරීම සඳහා කොළඹ අගරදගුරු පදවියේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමන් ඇතුළු පියතුමන්ලා කිහිප දෙනෙකුද එම ස්ථානයට පැමිණ සිටියේය.