නීතිඥ වෙස්ගත් වෙඩික්කරු ගිනිඅවිය සූක්ෂමව සඟවාගෙන ආ පොත මෙන්න

අලුත්කඩේ අධිකරණ සංකීර්ණයේ අංක 5 මහෙස්ත්‍රාත් අධිකරණ මැදිරිය තුළදී අද (19) උදෑසන සිදුවූ වෙඩි තැබීමකින් මරණයට පත්වූ සංවිධානාත්මක අපරාධකල්ලි නායකයෙකු වන ගණේමුල්ල සංජීව නොහොත් සංජීව කුමාර සමරරත්න නැමැත්තාට වෙඩි තැබීමට රිවොල්වරය රැගෙන විත් ඇත්තේ පොතක සඟවාගෙන බව වාර්තා වේ.

ඒ අනුව සැකකරු අපරාධ නඩු විධිවිධාන සංග්‍රහය තුළ අදාළ ගිනිඅවිය සඟවා විත් ඇත.

කෙසේවෙතත් සැකකරු අධිකරණ භූමිය තුළට ෆයිල් කවරයක් පමණක් රැගෙන ඇතුළු වන අයුරු CCTV කැමරාවක සටහන්ව තිබුණි.

ඒ අනුව අදාළ ගිනිඅවිය අධිකරණ භූමියේ සඟවන්නට ඇති බවට සැකපළ කෙරේ.

පොලීසිය පැවසුවේ, නීතිඥවරයෙකු ලෙස සැරසුණු පුද්ගලයෙකු විසින් අධිකරණය තුළදී මෙම වෙඩි තැබීම සිදුකර ඇති බවය.

වෙඩිතැබීමට සඳහා යොදා ගත් රිවොල්වරය මේ වන විට අධිකරණය භූමියේ තිබිය දී සොයා ගත් අතර නීතිඥ උපදේශන කාමරයේ තිබී එය සඟවාගෙන පැමිණීමට භාවිත කළ පොත සොයා ගැනීමට ආරක්ෂක අංශ සමත්ව තිබේ.

නඩු කටයුත්තක් වෙනුවෙන් ගනේමුල්ල සංජීව අද පෙරවරුවේ බූස්ස බන්ධනාගාරයේ සිට අධිකරණය වෙත රැගෙනවිත් තිබුණු අතර එහිදී මෙලෙස වෙඩි ප්‍රහාරයට ලක්විය.

මේ වනවිට අධිකරණ පරිශ්‍රය තුළ විශේෂ සෝදිසි මෙහෙයුමක් ක්‍රියාත්මක වන අතර ඒ අවට ආරක්ෂාව තර කර තිබේ.