අපනයන ආදායමෙහි කැපී පෙනෙන වර්ධනයක්

වෙළඳ භාණ්ඩ සහ සේවා යන දෙකම ඇතුළුව සමස්ත අපනයන 2025 පෙබරවාරි මාසයේදී එක්සත් ජනපද ඩොලර් මිලියන 1,382.53 ක් දක්වා ඉහළ ගොස් ඇති අතර එය 2024 පෙබරවාරි මාසයට සාපේක්ෂව 4.62% ක කැපී පෙනෙන වර්ධනයක් සනිටුහන් කරන බව ශ්‍රී  ලංකා අපනයන සංවර්ධන මණ්ඩලය සඳහන් කරනවා.

2025 ජනවාරි මාසයට සාපේක්ෂව පෙබරවාරි මාසයේදී අපනයන 2.58% ක මාසික වර්ධනයක් වාර්තා කර තිබෙනවා.

ශ්‍රී  ලංකා රේගුවේ තාවකාලික දත්ත සහ මැණික් හා ස්වර්ණාභරණ සහ ඛනිජ තෙල් නිෂ්පාදන සඳහා ඇස්තමේන්තුගත සංඛ්‍යා ලේඛනවලට අනුව 2025 පෙබරවාරි මාසයේ වෙළඳ භාණ්ඩ අපනයනයේ වටිනාකම එක්සත් ජනපද ඩොලර් මිලියන 1,056.39 ක්.

2025 පෙබරවාරි මාසයේ සේවා අපනයනය එක්සත් ජනපද ඩොලර් මිලියන 326.14 ක් ලෙස ඇස්තමේන්තු කර ඇති අතර එය 2024 හි අනුරූප කාල පරිච්ඡේදයට සාපේක්ෂව 24.37% ක වර්ධනයක් සනිටුහන් කරනවා.

කෙසේ වෙතත්, වෙළඳ භාණ්ඩ සහ සේවා යන දෙකම ඇතුළුව මුළු අපනයන 2025 ජනවාරි සිට පෙබරවාරි දක්වා කාලය සඳහා එක්සත් ජනපද ඩොලර් මිලියන 2,730.33 ක් ලෙස ඇස්තමේන්තු කර ඇති අතර එය 2024 දී එම කාලයට සාපේක්ෂව 6.65% ක වර්ධනයක් සනිටුහන් කරනවා.

ශ්‍රී  ලංකා රේගුවේ දත්ත සහ මැණික් හා ස්වර්ණාභරණ සහ ඛනිජ තෙල් නිෂ්පාදන සඳහා ඇස්තමේන්තුගත සංඛ්‍යා ලේඛන මත පදනම්ව 2025 පළමු මාස දෙක තුළ වෙළඳ භාණ්ඩ අපනයනය 3.9% කින් වර්ධනය වී ඇති අතර එය එක්සත් ජනපද ඩොලර් මිලියන 2,109.19 ක් දක්වා ඉහළ ගොස් ඇති බව ගණන් බලා තිබෙනවා.

මේ අතර, සේවා අපනයනවල ඇස්තමේන්තුගත වටිනාකම 2024 වසරේ අනුරූප කාලපරිච්ඡේදයට සාපේක්ෂව 17.2% කින් එක්සත් ජනපද ඩොලර් මිලියන 621.14 ක් දක්වා ඉහළ යනු ඇතැයි අපේක්ෂා කෙරෙනවා.