ආහාර සපයා ගැනීමට මුදල් නොමැතිකම හේතුවන් ශිෂ්‍ය නායිකාවක් දිවා ආහාර සඳහා කළටි
පොල්මද රැගෙන ඒමේ සිදුවීමක් පිළිබඳ ජාතික පුවත්පත්වල සහ සමාජ මධ්‍යයන්හි පළවන
ප්‍රවෘත්තිය අසත්‍යයක් බව ජනාධිපති මාධ්‍ය අංශය පවසනවා.

අදාළ පුවත පිළිබඳ ජනාධිපති කාර්යාලයේ අවධානය යොමුව ඇති බවයි ඔවුන් නිවේදනය කළේ.

ඒ අනුව මිනුවන්ගොඩ කලාප අධ්‍යක්ෂ වජිර රණරාජා, ගම්පහ දිස්ත්‍රික් ලේකම් ඩබ්ලිව්.එස්. සත්‍යානන්ද, දිවුලපිටිය ප්‍රාදේශීය ලේකම්, මිනුවන්ගොඩ අධ්‍යාපන කලාපයේ දිවුලපිටිය අධ්‍යාපන කොට්ඨාසයේ අධ්‍යක්ෂ සහ කෝංගොඩමුල්ල ශාන්ත අන්තෝනි කණිෂ්ඨ විද්‍යාලයේ විදුහල්පතිනිය හා එම සිදුවීමට අදාළ සිසුවිය ජීවත්වන ග්‍රාම නිලධාරී වසමේ ග්‍රාම නිලධාරී හා සංවර්ධන නිලධාරී යන සියලු නිලධාරීන්ගෙන් ලබාගත් තොරතුරු අනුව එවැනි සිදුවීමක් වාර්තා වී නොමැති බවට කරුණු තහවුරු වී තිබෙනවා.

කෙසේ වෙතත් රටේ මේ මොහොතේ පවතින ආර්ථික තත්ත්වය හමුවේ රටේ ඕනෑම තැනක යම් දරුවෙක්, පුද්ගලයෙක් හෝ පවුලක් මෙවැනි තත්ත්වයකට පත්ව සිටින්නේ නම් ඔවුන් වෙනුවෙන් විශේෂ වැඩසටහනක් මේ වන විටත් ප්‍රාදේශීය ලේකම් කාර්යාල සහ දිස්ත්‍රික් ලේකම් කාර්යාල
මට්ටමින් ක්‍රියාවට නංවා ඇතැයි ජනාධිපති මාධ්‍ය අංශය ප්‍රකාශ කළා.

ජනාධිපතිවරයාගේ විශේෂ උපදෙස් මත ජනාධිපති කාර්යාලයේ ද ආහාර සුරක්ෂිතතා වැඩසටහන්
ඒකකයක් ස්ථාපිත කර තිබෙන අතර 0114354647 හෝ 0114354354 අමතා දිගු අංක 5705 / 5707
ඔස්සේ එම ඒකකය හා සම්බන්ධ වෙමින් තොරතුරු ලබාදිය හැකියි.

සාමාජිකයන් 05 දෙනෙකුට වැඩියෙන් සිටින සමෘද්ධිලාභී පවුල්, ආබාධිත හා නිදන්ගත
රෝගවලින් පෙලෙන අය සිටින පවුල්, අවුරුදු 05ට අඩු ළමයින් සිටින දුගී පවුල්, ස්වාමියා හෝ බිරිඳ නොමැති පවුල්, ගර්භනී සහ කිරිදෙන මව්වරුන් සිටින පවුල්, ප්‍රාථමික අධ්‍යාපනයවත් නොලැබූ දුගී පවුල්, දරුණු ආහාර අහේනියකට මුහුණ පා සිටින
පවුල්, ලෝක ආහාර වැඩසටහන යටතේ ආධාර ලබාදීමට නිර්ණායක ලෙස හඳුනාගෙන තිබෙනවා.

මෙවැනි පවුල් සඳහා ලෝක ආහාර වැඩසටහන යටතේ මාසිකව රුපියල් 15,000ක් ග්‍රාම
නිලධාරීන් හා ප්‍රාදේශීය ලේකම්වරුන් හරහා ලබාදීමට හැකියාව ඇත. එහිදී මුල් මාස 03
සඳහා මුදල් ලබාදෙන අතර තවත් මාස 06 ක් සඳහා ආහාර ලබාදීමේ වැඩසටහනක් ක්‍රියාත්මක
වනවා.

මීට අමතරව අධික ආහාර අහේනියකින් පෙළෙන පවුල් 61,000ක් සඳහා රජයෙන් මාසිකව රු.
10,000ක්, මාස 06ක් දක්වා ලබාදීමට කටයුතු සකස් කර තිබෙනවා.

මෙම කිසිවකට ඇතුළත් නොවුණ, මේ අවස්ථාවේ ආහාර නොමැතිකමින් පීඩා විඳින පවුල් සිටී
නම් ඒ අය සඳහා ද කෙටිකාලීනව ආහාර ලබාදීමේ හැකියාවක් පවතින අතර ඔවුන් ඒ වෙනුවෙන්
ග්‍රාම නිලධාරි, ප්‍රාදේශීය ලේකම් හරහා හෝ ජනාධිපති ලේකම් කාර්යාලයේ ආහාර
සුරක්ෂිතතා වැඩසටහන් ඒකකය වෙත ඉල්ලීමක් කළ යුතුයි.

ඊට අමතරව මන්දපෝෂණයෙන් පෙළෙන ළමයින් සිටින පවුල් සිටී නම්, එවැනි පවුල් සඳහා රජයෙන් ක්‍රියාත්මක කෙරෙන මාපිය කැපකරු ක්‍රමය වැනි වැඩසටහන් ඔස්සේ අධ්‍යයනයන්සි දු කොට ආහාර ආධාර ලබාදීමේ වැඩසටහන් ක්‍රියාත්මක කරනු ලබනවා.

එමෙන්ම ආහාර නොමැති කමින් පෙළෙන පවුල් පිළිබඳව තොරතුරු පාසල් ගුරුවරුන්ටද මැදිහත්
වී අදාළ අංශ වෙත යොමු කළ හැකි අතර එවැනි පවුල් සඳහා ආධාර උපකාර කිරීමට කැමති හා
හැකියාවක් සහිත අයට ද මේ සඳහා සම්බන්ධ වී කටයුතු කිරීමේ අවස්ථාව පවතිනවා.

ඊට අමතරව ග්‍රාම නිලධාරීන්ට හා ප්‍රාදේශීය ලේකම්වරුන්ට මේ සමග සම්බන්ධ වී මෙම
වැඩසටහන් ක්‍රියාත්මත කිරීම වෙනුවෙන් සම්බන්ධීකරණ කටයුතු සිදුකිරීමේ අවස්ථාව ද
ඇති බවයි ජනාධිපති මාධ්‍ය අංශය කියාසිටියේ.

මිනුවන්ගොඩ අධ්‍යයන කලාපයේ කණිෂ්ඨ ද්විතීයික පාසලක සිසුවියක් පාසල් දිවා ආහාර
විවේකයේදී කලටි පොල් මද ආහාරයට ගන්නා ආකාරය ඇගේ පන්ති භාර ගුරුවරිය විසින් දැක
තිබු බවටයි වාර්තා වුයේ.

පසුව එම ගුරුවරිය මේ පිළිබඳව ආචාර්ය මණ්ඩලයේ සෙසු පිරිසට ද දැනුම් දී අදාළ දැරිය
ඇතුළු තවත් ළමුන් කිහිපදෙනෙකුට ආහාර සපයාදීමටයි කටයුතු කර ඇත්තේ.

අදාළ සිසුවිය 9 වැනි ශ්‍රේණියේ ඉගෙනුම ලබන අතර පාසලේ ශිෂ්‍ය නායිකාවකු ද වන ඇගේ
පියාට ස්ථිර රැකියාවක් නොමැති බවත් වාර්තා වුණා.

මේ අතර මිනුවන්ගොඩ අධ්‍යාපන කලාපයේ පාසලක ශිෂ්‍ය නායිකාවක් දිවා ආහාරයට කලටි පොල්
මද රැගෙන ආ බවට මාධ්‍යවල වාර්තා වූ පුවත පිළිබඳ මිනුවන්ගොඩ කලාප අධ්‍යාපන
අධ්‍යක්ෂවරයා නිවේදනයක් නිකුත් කර තිබෙනවා.

එහි සඳහන් වන්නේ සිය අධ්‍යාපන කලාපයේ කිසිදු පාසලක එවැනි සිදුවීමක් වී නොමැති බවට
සනාථ කරගත් බවයි.

source – Hirunews