Menu

Telephone :
(076) 074 4353

WhatsApp :
(076) 0744353 / (071) 876 8381 / (071) 905 6756

Email :
todaynewslk97@gmail.com/ support@todaynewslk.com

තමන්ම ඇල්ලූ කුඩ්ඩාගේ බිරිය සමග නාකොටික් සැරයන් කුඩු ජාවාරමේ

2 years ago

මත්ද්‍රව්‍ය ජාවාරම සම්බන්ධයෙන් බූස්ස බන්ධනාගාරයේ රඳවා සිටින පුද්ගලයෙකුගේ බිරිය සමග කුරුණෑගල ප්‍රදේශයේ පුද්ගලයෙකුට මත්ද්‍රව්‍ය විකිණීම සඳහා වෑන් රියකින් ගමන් කරමින් සිටි කොළඹ පොලිස් මත්ද්‍රව්‍ය නාශක කාර්යාංශයේ සැරයන්වරයෙකු අඹන්පොළ පොලිසිය කළ වැටලීමකදී අත්අඩංගුවට ගෙන ඇත.

අත්අඩංගුවට ගත් සැරයන්වරයා ඊට පෙරදා කොළඹ සිට පැමිණ ඇත්තේ ඔහු සමග වෑන් රියේ සිටි කාන්තාවගේ බන්ධනාගාරගතව සිටින සැමියාගේ නඩුව සඳහා මත්ද්‍රව්‍ය නාශක කාර්යාංශය වෙනුවෙන් අධිකරණය හමුවේ පෙනී සිටීම සඳහා ය.

සැරයන්වරයා සමග අත්අඩංගුවට ගත් කාන්තාව කුරුණෑගල හා අඹන්පොළ අවට මත්කුඩු බෙදා හැරීමේ යෙදෙන ‘සුදු අක්කා’ නමැත්තිය බව අඹන්පොළ පොලිසිය කීය.

මත්කුඩු විකිණීම සඳහා සැරයන්වරයා පැමිණි කළු පැහැති වෑන් රිය සැරයන්වරයාට මිලට ගෙන දී ඇත්තේ මෙම කාන්තාව බව ද කියයි.

මීට වසරකට පෙර මත්කුඩු ජාවාරමේ යෙදීම සම්බන්ධයෙන් ඇගේ සැමියා අත්අඩංගුවට ගෙන ඇත්තේ ද මත්ද්‍රව්‍ය නාශක කාර්යාංශයේ රාජකාරියේ නියුතු මෙම සැරයන්වරයා ඇතුළු කණ්ඩායමක් වීම ද විශේෂත්වයකි.

මත්ද්‍රව්‍ය සමග අත්අඩංගුවට ගැනුණු ඇගේ සැමියා අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කිරීමෙන් පසුව සැමියා කළ මත්ද්‍රව්‍ය ජාවාරම ඔහුගේ බිරිය සිදු කර ඇති අතර පසුව මෙම සැරයන්වරයා එම මත්ද්‍රව්‍ය නඩුවට කුරුණෑගල අධිකරණයට පෙනී සිටින අවස්ථාවලදී ජාවාරම්කරුගේ තරුණ බිරිය සමග ද සමීප සබඳතාවක් ගොඩනගා ගෙන ඇති බව පොලිස් ආරංචි මාර්ග සඳහන් කරයි.

ඒ සබඳකම මත සැමියා බේරා ගැනීමේ අදහසින් ජාවාරම්කරුගේ බිරිය මෙම සැරයන්වරයාට අදාළ වාහනය ලබා දී ඇති බවට තොරතුරු ද වාර්තා වී තිබේ.

ඉකුත් දින ඇගේ සැමියාට එරෙහිව නගා තිබූ නඩුව අධිකරණයේ විභාග වීමට නියමිතව තිබූ අතර ඒ සඳහා සැරයන්වරයා එම වෑන් රියෙන් ම පැමිණ නඩුවට පෙර දින ජාවාරම්කරුගේ බිරිය මුණ ගැසී ඇය සමඟ රැඳී සිට මාවතගම සිය නිවස බලා ගොස් ඇති බවට විමර්ශනවලදී අනාවරණය වී ඇත.

ඊට පසුදින සැරයන්වරයා සිය නිවසේ සිට කුරුණෑගල අධිකරණය වෙත පැමිණ ඇති අතර ජාවාරම්කරුගේ තරුණ බිරිය අධිකරණයට ඉදිරිපත් කරන සිය සැමියා දැක බලා ගැනීමට පැමිණ තිබේ.

නඩුව අවසානයේ ජාවාරම්කරු නැවත රක්ෂිත බන්ධනාගාරගත කෙරුණු අතර ඔහුගේ බිරිය සැමියාගේ නඩුවට පෙනී සිටි මෙම සැරයන්වරයාගේ වෑන් රියට ගොඩ වී ඇත.

මේ අතර, අඹන්පොළ පොලිසියේ නිලධාරීන් කණ්ඩායමක් මත්ද්‍රව්‍ය වැටලීමක නිරතව සිටියදී මත්කුඩු ග්‍රෑම් 890ක් සමග සිවිල් ආරක්ෂක බළකා කඳවුරක සෙබළෙකු අත්අඩංගුවට ගෙන තිබේ.

ඔහුට මත්ද්‍රව්‍ය ලැබුණු ආකාරය ගැන ප්‍රශ්න කරද්දී ඔහු පවසා ඇත්තේ අඹන්පොළ ‘සුදු අක්කාගෙන්’ තමා මත්කුඩු ලබාගත් බව ය.

පසුව වැටලීමේ යෙදුණු නිලධාරීන් ඔහු ලවා සුදු අක්කාට දුරකතන ඇමතුම් දෙමින් මත්ද්‍රව්‍ය මිලට ගැනීමට අවශ්‍ය බව පවසා ඇත.

පසුව ඇය පවසා ඇත්තේ තමා කුරුණෑගල සිටින බවත් නගරයට පැමිණ තමාට ඇමතුමක් දෙන ලෙසත් ය.

ඉන් අනතුරුව පොලිස් කණ්ඩායම ද ‘සුදු අක්කා’ කොටු කර ගැනීමේ අදහසින් ඔත්තුකරු ද සමග කුරුණෑගල නගරයට පැමිණ ඔත්තුකරු ලවා ‘සුදු අක්කා’ අමතා ඇත.

එහිදී සුදු අක්කා පවසා ඇත්තේ තමා නගරයේ සාන්ත ආනා විදුහල අසල කළු පැහැති වෑන් රියක සිටින බව ත් එතැනට පැමිණෙන ලෙසත් ය. ඒ අනුව ඔත්තුකරු සුදු අක්කා රැඳී සිටි වෑන් රිය වෙත යවා මත්කුඩු මිල දී ගැනීමට සැරසෙත් ම නිලධාරීන් වෑන් රිය වැටලීමට සූදානම් වී ඇති අතර ඊට බිය වූ රිය අසුනේ සිටි පුද්ගලයා වෑන් රියෙන් බැස පළා ගොස් තිබේ.

පසුව නිලධාරීන් පළා ගිය ඔහු අල්ලා පරීක්ෂා කරද්දී තමා නාකොටික් එකේ සාජන් කෙනෙකු බව පවසා නිලධාරීන්ගෙන් බේරී යාමට උත්සහ කළ ද වැටලීමේ යෙදුණු කණ්ඩායම අත්අඩංගුවට ගත් සුදු අක්කා සමග සැරයන්වරයා ද පොලිස් ස්ථානාධිපතිවරයා හමුවට ඉදිරිපත් කර ඇත.

පසුව කරන ලද සෝදිසි කිරීමේදී වෑන් රියේ ඉදිරිපස අසුනේ සිටි සුදු අක්කා නමැති මත්ද්‍රව්‍ය ජාවාරම්කාරියගේ සන්තකයේ හෙරොයින් ග්‍රෑම් 3යි මිලිග්‍රෑම් 100ක් ද සැරයන්වරයා සතුව හෙරොයින් ග්‍රෑම් 2යි මිලිග්‍රෑම් 32ක්ද තිබී අඹන්පොළ පොලිස් නිලධාරීන් සොයාගෙන තිබේ.

සැරයන්වරයා වෑන් රිය පදවා ඇති අතර ජාවාරම්කාරිය රියේ ඉදිරිපස අසුනේ තබාගෙන මෙම මත්ද්‍රව්‍ය ජාවාරම කර ඇතැයි අඹන්පොළ පොලිසිය කියයි.

සැරයන්වරයා මෙලෙස ඇය සමග සමීප සබඳකම් පවත්වමින් මෙම ජාවාරම කර ඇත්තේ කවර කාලයක සිට ද යන්න සොයා ගැනීම සඳහා සැකකාරිය සහ සැකකරු අධිකරණයට ඉදිරිපත් කිරීමෙන් අනතුරුව මේ මස 18 වන දා දක්වා වැඩිදුර විමර්ශන සඳහා රඳවාගෙන ප්‍රශ්න කරන බව අඹන්පොළ පොලිසිය සඳහන් කරයි.

නිකවැරටිය කොට්ඨාස භාර ජ්‍යෙෂ්ඨ පොලිස් අධිකාරි ජනක් නන්දනගේ අධීක්ෂණය මත සහකාර පොලිස් අධිකාරි ජයන්ත ගුණවර්ධනගේ උපදෙස් මත අඹන්පොළ පොලිස් ස්ථානාධිපති සමන් පෙරේරාගේ මෙහෙයවීමෙන් උපපොලිස් පරීක්ෂක පියරත්න ඇතුළු කණ්ඩායමක් මෙම වැටලීම කළහ.

(කීර්ති මෙන්ඩිස්, නන්දන කැලේගම – මව්බිම)

Leave a Reply

Leave a Reply

Your email address will not be published. Required fields are marked *