ගැබිණි මව්වරුන්ට බරපතළ සෞඛ්‍ය අවදානමක්

ශ්‍රී ලංකාවේ ගැබිණි මව්වරුන්ගෙන් 13%කට වැඩි පිරිසකට ගර්භණී සමයේදී වැළඳෙන දියවැඩියා තත්ත්වය (Gestational Diabetes) පවතින බව සෞඛ්‍ය අංශ අනාවරණය කරයි.

ශ්‍රී ලංකා වෛද්‍ය සංගමයේ සභාපති, දියවැඩියාව සහ අන්තරාසර්ග රෝග පිළිබඳ විශේෂඥ වෛද්‍ය මනිල්ක සුමනතිලක මහතා සඳහන් කළේ මෙම තත්ත්වය වර්ධනය වීමට වර්තමානයේ පවතින වැරදි ආහාර පුරුදු සෘජුවම බලපා ඇති බවයි.

කාබෝහයිඩ්‍රේට් සහ සීනි අධික ආහාර ලබාගැනීම ගැබිණි සමයේ දියවැඩියාව ඇති වීමට ප්‍රධාන හේතුවක් වී තිබේ.

ගර්භණී සමයේ පවතින දියවැඩියාව මවට මෙන්ම දරුවාගේ සෞඛ්‍යයට ද දීර්ඝකාලීන බලපෑම් ඇති කළ හැකිය.

ගැබිණි වීමට පෙර සහ ගැබිණි සමය තුළ නිසි ආහාර පාලනයක් සහ වෛද්‍ය උපදෙස් පිළිපැදීම ඉතා වැදගත් වේ.

මෙම තත්ත්වය වළක්වා ගැනීම සඳහා පෝෂ්‍යදායී ආහාර වේලක් ලබාගැනීමටත්, ක්‍රියාශීලී දිවි පෙවෙතක් පවත්වා ගැනීමටත් අවධානය යොමු කළ යුතු බව වෛද්‍යවරු වැඩිදුරටත් අවධාරණය කරති.