රටේ දැඩි ආන්දෝලනයක් ඇති කළ් පනතකට ආණ්ඩුවෙන් සංශෝධන

පාර්ලිමේන්තුවට ඉදිරිපත් කර ඇති “පදිංචිකරුවන් ආරක්ෂා කිරීමේ පනත් කෙටුම්පත” යලි සළකා බලා සංශෝධිත පනත් කෙටුම්පතක් පාර්ලිමේන්තුවට ඉදිරිපත් කිරීමට රජය අපේක්ෂා කරන බව නීතිපතිවරයා ශ්‍රේෂ්ඨාධිකරණයට දැනුම් දුන්නා.

අදාළ පනත් කෙටුම්පත අභියෝගයට ලක් කරමින් ගොනු කර තිබූ පෙත්සම් 06 ක් විභාගයට ගත් අවස්ථාවේදීයි නීතිපතිවරයා මෙම දැනුම්දීම සිදුකළේ.

ඒ සමග අදාළ පෙත්සම් ඉල්ලා අස්කර ගැනීමට පෙත්සම්කරුවන්ට අධිකරණය අවසර ලබා දුන්නා.

“පදිංචිකරුවන් ආරක්ෂා කිරීමේ පනත් කෙටුම්පත” පිළිබඳ මහජනතා අදහස් හා යෝජනා ලබා ගැනීම සඳහා අධිකරණ අමාත්‍යවරයා පෙබරවාරි මස 03 වනදා සිට මාසයක කාලයක් ලබා දී තිබෙන බවද නීතිපතිවරයා වෙනුවෙන් අතිරේක සොලිසිටර් ජෙනරාල්වරයා පැවසූවා.

එම අදහස් හා යෝජනා නීතිපතිවරයා, ශ්‍රී ලංකා නීතිඥ සංගමය හා අධිකරණ අමාත්‍යවරයා යන පාර්ශ්ව නම් කරනු ලබන විශේෂඥයින්ගෙන් සමන්විත කමිටුවක් විසින් සළකා බැලීමට නියමිතයි.

මෙම පෙත්සම් තුළින් ඉදිරිපත් කරන කරුණු ද සළකා බැලීමට නියමිත බවයි ඔහු පැවසූවේ.

ඉන් අනතුරුව එම විශේෂඥ කමිටුව විසින් අදාල පනත් කෙටුම්පතට සිදුකළ යුතු සංශෝධන අඩංගු වාර්තාවක් අධිකරණ අමාත්‍යවරයා වෙත ඉදිරිපත් කිරීමට නියමිතයි.

එම සියලු කරුණු සළකා බැලීමෙන් අනතුරුව සංශෝධිත පනත් කෙටුම්පතක් ඉදිරි කාලයේ පාර්ලිමේන්තුවට ඉදිරිපත් කිරීමට අධිකරණ අමාත්‍යවරයා අපේක්ෂා කරන බවත් අතිරේක සොලිසිටර් ජෙනරාල්වරයා දන්වා සිටියා.

මෙම කරුණු ඇතුළත් කර අධිකරණ අමාත්‍යංශයේ ලේකම්වරිය විසින් නීතිපතිවරයා වෙත ඒවා තිබූ ලිපියක් ද ඔහු අධිකරණයට ඉදිරිපත් කළා.