සාමාන්‍ය පෙළ විභාගයට පෙනී සිටින සිසුන්ට විශේෂ දැනුම්දීමක්

2025 වර්ෂයට අදාළ අධ්‍යාපන පොදු සහතික පත්‍ර සාමාන්‍ය පෙළ විභාගය හෙට (17) දිවයින පුරා පිහිටි විභාග මධ්‍යස්ථාන 3,545කදී ආරම්භ වීමට නියමිතය.

මෙවර විභාගය සඳහා අපේක්ෂකයින් 451,463ක් පෙනී සිටින බව විභාග දෙපාර්තමේන්තුව සඳහන් කරයි.

විභාගයට පෙනී සිටින සිසුන් හෙට දිනයේ පීඩනයකින් තොරව සැහැල්ලු මනසකින් පසුවීම ඉතා වැදගත් බව රාගම වෛද්‍ය පීඨයේ මහාචාර්ය විශේෂඥ මනෝ වෛද්‍ය මියුරු චන්ද්‍රදාස මහතා අවධාරණය කරයි.

විශේෂයෙන්ම රාත්‍රියේ නිදි වර්ජිතව පාඩම් කිරීමෙන් වැළකී සිටිය යුතු බවත්, ආගමික වතාවත්වල නිරත වෙමින් සිත සන්සුන් කර ගැනීම සුදුසු බවත් වෛද්‍යවරයා පෙන්වා දෙයි.

මේ වන තෙක් අධ්‍යයනය කර නොමැති අලුත් විෂය කරුණු කියවීමට උත්සාහ නොකර, දැනටමත් ඉගෙන ගෙන ඇති කරුණු පමණක් නැවත ආවර්ජනය කිරීම ප්‍රමාණවත් බව ඔහු වැඩිදුරටත් සඳහන් කළේය. හෙට දිනට අවශ්‍ය පෑන්, පැන්සල් ඇතුළු උපකරණ කලින්ම සූදානම් කරගෙන මානසික නිරවුල්භාවය පවත්වා ගැනීම මෙහිදී අතිශය වැදගත් වේ.

විභාග ශාලාව තුළදී ප්‍රශ්න පත්‍රය ලැබුණු පසු මුල් විනාඩි 5ක කාලය ඉතා තීරණාත්මක බව පෙන්වා දෙන වෛද්‍යවරයා, එම කාලය තුළ මානසික පීඩනය ඉහළ යා හැකි බැවින් වහාම පිළිතුරු ලිවීමට උත්සාහ නොකරන ලෙස සිසුන්ට දන්වා සිටී.

ඒ වෙනුවට මුළු ප්‍රශ්න පත්‍රයම හොඳින් කියවා තමන්ට වඩාත්ම පහසු ප්‍රශ්නය තෝරාගෙන පිළිතුරු ලිවීම ආරම්භ කිරීමෙන් සෘණාත්මක පීඩනය අවම කර ධනාත්මක ප්‍රවේශයක් ලබා ගත හැකි බව මහාචාර්ය මියුරු චන්ද්‍රදාස මහතා වැඩිදුරටත් පෙන්වා දුන්නේය.