පුෂ්පිකාගේ රූ රැජින කිරුළ ගැලවූ නඩුවේ තීන්දුවට දින නියම කෙරේ

2021 වසරේ ‘විවාහක රූ රැජිණ’ (Mrs. Sri Lanka for Mrs. World)’ තරඟාවලියේදී ජයග්‍රාහිකාව වූ පුෂ්පිකා ද සිල්වාගේ හිසෙන් බලහත්කාරයෙන් කිරුළ ගැලවීමේ සිදුවීමට අදාළ නඩුවේ අවසන් තීන්දුව ලබන ඔක්තෝබර් මස 17 වැනිදා ප්‍රකාශයට පත් කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම මහතා අද (22) නියෝග කළා.

මෙම නඩුව පවරා ඇත්තේ හිටපු විවාහක රූ රැජිණක වන කැරොලයින් ජූරි සහ ප්‍රකට නිරූපණ ශිල්පිනී චූලා පද්මේන්ද්‍ර යන අයට එරෙහිවයි.

නෙලුම් පොකුණ රංග පීඨයේ පැවැති අවසන් මහා තරඟයේදී පුෂ්පිකා ද සිල්වා ජයග්‍රාහිකාව ලෙස ප්‍රකාශයට පත් කිරීමෙන් සුළු මොහොතකට පසු, මොවුන් දෙදෙනා බලහත්කාරයෙන් වේදිකාවට කඩා වැදී ඇයගේ හිසෙහි තිබූ කිරුළ ගලවා දැමූ බවට චෝදනා එල්ල වී තිබුණා.

මෙම නඩුව අද කොළඹ මහේස්ත්‍රාත් අධිකරණය හමුවේ කැඳවූ අවස්ථාවේදී ප්‍රධාන මහේස්ත්‍රාත්වරයා තහවුරු කළේ, සිද්ධියට අදාළ සියලුම සාක්ෂි විභාග කර අවසන් කර ඇති බැවින් අවසන් තීන්දුව ප්‍රකාශයට පත් කිරීමට කටයුතු සූදානම් කර ඇති බවයි.

2021 වසරේදී මෙරට මෙන්ම ජාත්‍යන්තරයේ ද දැඩි අවධානයක් දිනාගත් මෙම ආන්දෝලනාත්මක සිදුවීමේදී, සැකකාරියන් දෙදෙනා තරඟාවලියට බාධා කරමින් පුෂ්පිකා ද සිල්වාට තුවාල සිදුකළ බවටද චෝදනා එල්ල වී තිබුණා.

ඒ අනුව දීර්ඝ වශයෙන් විභාග වූ මෙම නඩුවේ අවසන් තීන්දුව ප්‍රකාශ කිරීම සඳහා අධිකරණය විසින් මෙලෙස ඔක්තෝබර් 17 වැනිදා දින නියම කරනු ලැබුවා.