නලින් බණ්ඩාරගේ චෝදනාවට මාර්ග සංවර්ධන අධිකාරියෙන් හැරෙන තැපෑලෙන් පිළිතුරු

මාර්ග සංවර්ධන අධිකාරිය විසින් මාර්ගගත ක්‍රමයට රුපියල් මිලියන 380කට ආසන්න මුදලක් ඉකුත් 2023දී ගෙවීම් කරනු ලැබූ කොන්ත්‍රාත්කරුවන් පිරිසකටම නැවත වරක් වැරදීමකින් ගෙවා ඇති බවට සජබ පාර්ලිමේන්තු මන්ත්‍රී නලින් බණ්ඩාර අද (26) කළ අනාවරණය ප්‍රතික්ෂේප කරමින් මාර්ග සංවර්ධන අධිකාරියේ කළමණාකාරීත්වය නිවේදනයක් නිකුත් කර තිබෙනවා.

පාර්ලිමේන්තු මන්ත්‍රී නලින් බණ්ඩාර විසින් සිදුකරනු ලැබූ මෙම ප්‍රකාශය සම්පූර්ණයෙන්ම පදනම් විරහිත වන අතර සත්‍ය කරුණු වසන් කරමින් ඉදිරිපත් කර ඇතැයි ද එම නිවේදනයේ සඳහන්.

මාර්ග සංවර්ධන අධිකාරියේ කළමණාකාරිත්වය විසින් නිකුත් කළ එම නිවේද‍නයේ මෙසේ සඳහන් වෙනවා.

කොන්ත්‍රාත්කරුවන්ට රුපියල් මිලියන 380කට අධික මුදලක් ද්විත්ව ගෙවීමක් කළ බවට සමාජ මාධ්‍ය වේදිකාවල දැනට සංසරණය වෙමින් පවතින, ගරු නලින් බණ්ඩාර මන්ත්‍රීවරයා විසින් සමාජ මාධ්‍ය හරහා ප්‍රසිද්ධියේ කරන ලද අසත්‍ය සහ නොමඟ යවන චෝදනා මාර්ග සංවර්ධන අධිකාරිය (RDA) තරයේ ප්‍රතික්ෂේප කරනු ලැබේ.

මෙම ප්‍රකාශ සම්පුර්ණයෙන්ම පදනම් විරහිත වන අතර සත්‍ය කරුණු වසන් කරමින් ඉදිරිපත් කර ඇත.

කිසිදු ද්විත්ව ගෙවීමක් මාර්ග සංවර්ධන අධිකාරිය විසින් සිදු කර ඇති බවට වන චෝදනාව මාර්ග සංවර්ධන අධිකාරිය ප්‍රතික්ෂේප කරනු ලැබේ. මාර්ග සංවර්ධන අධිකාරිට අයත් ගිණුම්වලින් එවැනි ද්විත්ව ගෙවීමක් සිදු කර නොමැති බවත්, මාර්ග සංවර්ධන අධිකාරියට කිසිදු මූල්‍ය අලාභයක් සිදුවී නොමැති බවත් මාර්ග සංවර්ධන අධිකාරිය තහවුරු කරයි.

මෙම කාරණයේදී මූල්‍ය අක්‍රමිකතාවයක් සිදු වී ඇති බවට වන කාරණය සමග මාර්ග සංවර්ධන අධිකාරිය සම්බන්ධ කිරීමට ගන්නා ඕනෑම උත්සාහයක් නොමඟ යවන, වගකීම් විරහිත සහ පදනම් විරහිත ය.

ගරු නලින් බණ්ඩාර මන්ත්‍රීවරයා විසින් කරන ලද ප්‍රකාශ ද්වේශ සහගත සහ සත්‍ය පදනමකින් තොරව කරන ලද බවට මාර්ග සංවර්ධන අධිකාරිය සලකයි. මාර්ග සංවර්ධන අධිකාරිය මේ වන විට මෙම කරුණ සමාලෝචනය කරමින් සිටින අතර මෙම ප්‍රකාශ සම්බන්ධයෙන් සුදුසු ක්‍රියාමාර්ග ගැනීමට කටයුතු කරමින් සිටිති.

සත්‍යාපනය නොකළ තොරතුරු පැතිරීම රාජ්‍ය ආයතනවල කීර්ති නාමයට හානි කරන අතර මහජනතාව නොමඟ යවන බැවින්, එවැනි අන්තර්ගතයෙන් බෙදා ගැනීමට පෙර වගකීමෙන් කරුණු සත්‍යාපනය කරන ලෙස මාර්ග සංවර්ධන අධිකාරිය මහ ජනතාවගෙන් සහ මාධ්‍ය ආයතනවලින් කාරුනිකව ඉල්ලා සිටී.

මාර්ග සංවර්ධන අධිකාරිය හි සියලුම මෙහෙයුම්වලදී විනිවිදභාවය, වගවීම සහ අඛණ්ඩතාව පිළිබඳ ඉහළම ප්‍රමිතීන් පවත්වා ගැනීමට මාර්ග සංවර්ධන අධිකාරිය කැපවී සිටී.

මේ අතර, මාර්ග සංවර්ධන අධිකාරිය විසින් මාර්ගගත ක්‍රමයට රුපියල් මිලියන 380කට ආසන්න මුදලක් 2023දී ගෙවීම් කරනු ලැබූ කොන්ත්‍රාත්කරුවන් පිරිසකටම නැවත වරක් වැරදීමකින් ගෙවා ඇති බවට පාර්ලිමේන්තු මන්ත්‍රී නලින් බණ්ඩාර මහතා කළ ප්‍රකාශය අසත්‍ය එකක් බව ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන පවසනවා.

හිරු ප්‍රවෘත්ති කළ විමසීමකදී ඔහු වැඩිදුරටත් ප්‍රකාශ කළේ මෙම සිද්ධියට අදාළව මාර්ග සංවර්ධන අධිකාරියෙන් කරුණු පැහැදිලි කිරීමක් සිදුවනු ඇති බවයි.