පැතුම් නිස්සංකගෙන් ශතකයක්

එල්.පී.එල්. ක්‍රිකට් තරගාවලියේ 11වැනි තරගය ලෙසින් දඹුල්ල ජාත්‍යන්තර ක්‍රිකට් ක්‍රීඩාංගණයේ අද (09දා) පස්වරුවේ පැවැත්වෙන තරගයේ පළමුව පන්දුවට පහරදුන් ජැෆ්නා කිංග්ස් කණ්ඩායම පන්දුවාර 20 තුළදී කඩුලු 07ක් දැවී ලකුණු 224ක් රැස්කිරීමට සමත් වුණා.

මෙය මෙවර තරග වාරයේ කණ්ඩායමක් රැස්කළ වැඩිම ලකුණු සංඛ්‍යාව ලෙස වාර්තා අතරට එක් විය.

එමෙන්ම එල්.පී.එල්. තරග ඉතිහාසයේ කණ්ඩායමක් රැස්කළ දෙවැනි වැඩිම ලකුණු සංඛ්‍යාව ලෙසින්ද එය වාර්තා අතරට එක්විය.

ජැෆ්නා කණ්ඩායමේ ඉහළම ලකුණු ලාභියා බවට පත් වූ පැතුම් නිස්සංක පන්දු 59කට මුහුණදෙමින් ලකුණු 119ක් රැස් කළේය.

ඔහුගේ ඉනිමට හයේ පහර 04ක් හා හතරේ පහර 16ක් අන්තර්ගත විය.

මෙය පැතුම්ගේ කුළුදුල් විස්සයි20 ශතකයයි.

එමෙන්ම ඔහු සිය ශතකය පන්දු 52කින් ගොඩනැගූ අතර, එය එල්.පී.එල්. ඉතිහාසයේ වාර්තා වූ දෙවැනි වේගවත්ම ශතකයද වේ.