ලබන සතියේ පාසල් පැවැත්වීම සම්බන්ධයෙන් විශේෂ දැනුම්දීමක්

ඉන්ධන අර්බුදය හමුවේ උද්ගතව ඇති ප්‍රවාහන අසීරුතා හේතුවෙන් ලබන සඳුදා සිට සතියක කාලයක් සඳහා කොළඹ නගරයේ සියලුම පාසල් වසා දැමීමට තීරණය කර තිබේ.

අධ්‍යාපන අමාත්‍යංශයේ ලේකම් එම්. එන් රණසිංහ මහතා සඳහන් කළේ ප්‍රවාහන ගැටලු නොමැති දිවයිනේ සියලුම ග්‍රාමීය පාසල් විදුහල්පතිවරුන්ගේ අභිමතය පරිදි පවත්වාගෙන යා හැකි බවය.

එමෙන්ම තදාසන්න නගරවල පාසල් එම සතිය තුළ ඔන්ලයින් ක්‍රමවේදයට ඉගැන්වීම් කටයුතු සිදුකිරීමට තීරණය කළ බව අමාත්‍යංශ ලේකම්වරයා වැඩිදුරටත් සඳහන් කළේය.

ඔන්ලයින් අධ්‍යාපන සිදුවන දහවල් කාලය තුළ විදුලි කප්පාදුවක් සිදුනොකරන ලෙස මහජන උපයෝගීතා කොමිසමෙන් ද ඉල්ලීමක් කළ බව ඔහු පැවසීය.

අධ්‍යාපන අමාතයංශ ලේකම්වරයා වැඩිදුරටත් පැවසුවේ එළඹෙන 25 වන සෙනසුරාදා දින අධ්‍යාපන බලධාරීන් රැස්වී සිදුකරන සමාලෝචනයකින් අනතුරුව ඊළඟ සතියේ අධ්‍යාපන කටයුතු සිදුකරන ආකාරය තීරණය කරන බවය.