ඉන්ධන කෝටාව ගැන ශ්‍රේෂ්ඨාධිකරණය නීතිපතිට දුන් උපදෙස

වෘත්තීයවේදීන් සඳහා නිකුත් කරනු ලබන ඉන්ධන කෝටාව ඉහළ දැමීමට ඇති හැකියාව පිළිබඳව සොයා බලන ලෙස ශ්‍රේෂ්ඨාධිකරණය නීතිපතිවරයාට උපදෙස් ලබා දී තිබේ.

ඉන්ධන, විදුලිය, ඖෂධ , ආහාර ඇතුළු අත්‍යාවශ්‍ය සේවාවන් අඛණ්ඩව මහජනතාව වෙත සපයාදීම සඳහා දිගුකාලීන හා කෙටිකාලීන වැඩපිළිවෙලක් සකස් කරන ලෙස රජය වෙත නියෝග කරන්නැයි ඉල්ලා ශ්‍රී ලංකා නීතීඥ සංගමය විසින් ඉදිරිපත් කළ මූලික අයිතිවාසිකම් පෙත්සම් දෙකක් කැඳවූ අවස්ථාවේදී ත්‍රිපුද්ගල විනිසුරු මඩුල්ලේ සභාපති විනිසුරු විජිත් මළල්ගොඩ මහතා මේ බව නීතිපතිවරයාට දන්වා තිබේ.

මෙම පෙත්සම අද විජිත් මළල්ගොඩ, මහින්ද සමයවර්ධන සහ අර්ජුන ඔබේසේකර යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී පෙත්සම්කාර ශ්‍රී ලංකා නීතිඥ සංගමය වෙනුවෙන් පෙනී සිටි ජනාධිපති නීතිඥ උදිත ඉගලහේවා මහතා කරුණු දක්වමින් නීතිඥවරු, වෛද්‍යවරු, ඉංජිනේරුවන් වැනි වෘත්තීයවේදීන්ට සිය රාජකාරි ඉටු කිරීමේදී දුර ගමන් යාමට සිදුවන හෙයින් දැනට නිකුත් කරනු ලබන ඉන්ධන කෝටාව ප්‍රමාණවත් නොවන බව දැනුම් දී තිබේ.

ඔවුන්ගේ රාජකාරිය නිසිපරිදි ඉටුකිරීම සඳහා ඔවුන් සේවය කරනු ලබන ආයතනවල නිර්දේශ යටතේ හෝ අදාළ ඉන්ධන කෝටාව වැඩි කිරීමට ඇති හැකියාව සොයා බලන ලෙසත් ජනාධිපති නීතිඥවරයා අධිකරණය හමුවේ කරුණු පෙන්වා දුනි.

අනතුරුව අදාළ මූලික අයිතිවාසිකම් පෙත්සම නොවැම්බර් මස 01 වනදා කැඳවීමට අධිකරණය නියම කර ඇත.