ලංකාවට සහන මිලට ඉන්ධන මිලට ගන්න අවස්ථාවක්

මැදපෙරදිග කලාපයේ පැවති යුදමය නොසන්සුන්තාවයෙන් පසුව ශ්‍රී ලංකාවට බොරතෙල් රැගෙන ආ පළමු නෞකාව වන ඉන්දියානු නැව් සංස්ථාවට අයත් ‘දේශ් මහීමා’ (Desh Mahima) නෞකාව ඊයේ (17) සාර්ථකව කොළඹ වරායට ළඟා විය.

එක්සත් අරාබි එමීර් රාජ්‍යයේ සිට පැමිණි මෙම නෞකාව බොරතෙල් මෙට්‍රික් ටොන් 97,500ක ප්‍රමාණයක් රැගෙන ආ අතර, එම තොගය මේ වන විට සපුගස්කන්ද පිරිපහදු මධ්‍යස්ථානය වෙත සම්ප්‍රේෂණය කිරීම ආරම්භ කර තිබේ.

මේ අතර ඇමෙරිකාවේ සිට (WTI) බොරතෙල් රැගෙන එන තවත් නෞකාවක් පෙරේදා (16) දිනයේදී ශ්‍රී ලංකාව බලා සිය ගමන ආරම්භ කර ඇති බව බලධාරීන් තහවුරු කරයි.

රුසියානු තෙල් අලෙවිය සඳහා අමෙරිකානු රජය විසින් තවත් මාසයක (මැයි 16 දක්වා) සහන කාලයක් ලබා දීමත් සමඟ, සහන මිලට රුසියාවෙන් ඉන්ධන සහ ගල් අඟුරු මිලදී ගැනීමට ශ්‍රී ලංකාවට රාජ්‍යතාන්ත්‍රික මට්ටමින් අවස්ථාව උදාවී තිබේ. රුසියානු රජය දැනටමත් ප්‍රකාශ කර ඇත්තේ ශ්‍රී ලංකාවේ බලශක්ති අවශ්‍යතා සපුරාලීමට ඕනෑම අවස්ථාවක සහනදායී කොන්දේසි යටතේ ඉන්ධන සැපයීමට තමන් සූදානම් බවයි.