අතිඋතුම් මැල්කම් කාදිනල් රංජිත් හිමිපාණන් විශේෂ කාදිනල් සභාවට එක්වෙයි

ශුද්ධෝත්තම ෆ්‍රැන්සිස් පාප් වහන්සේගේ විශේෂ ආරාධනයකට අනුව වතිකානයේ පසුගිය ජුනි 26 සහ 27 යන දිනවල පැවැත්වුණු “දෙවන විශේෂ කාදිනල් සභාව” සඳහා කොළඹ අගරදගුරු අතිඋතුම් මැල්කම් කාදිනල් රංජිත් හිමිපාණන් සහභාගී වී තිබේ.

කතෝලික සභාවේ ඉදිරි ගමන, ලෝක සාමය සහ වත්මන් ගෝලීය අභියෝග සම්බන්ධයෙන් කාදිනල් මණ්ඩලයේ සෘජු අදහස් හා උපදෙස් ලබාගැනීම අරමුණු කරගත් මෙම උපදේශන හමුව ශුද්ධෝත්තම පාප් වහන්සේගේ ප්‍රධානත්වයෙන් ඉතා උත්කර්ෂවත් අයුරින් පැවැත්විණි.

වතිකානයේ ශාන්ත පේදුරු බැසිලිකාවේ (St. Peter’s Basilica) පැවති විශේෂ සහභාගිත්ව දිව්‍ය පූජාවකින් මෙම විශේෂ සභාව ආරම්භ වූ අතර, එහි නිල සැසිවාර හතරක් (04) වතිකානයේ VI වන පාවුළු ශ්‍රවණාගාරයේදී පවත්වනු ලැබීය.

ශාන්ත පේදුරු බැසිලිකාවේ පැවති දිව්‍ය පූජාවකින් ආරම්භ වූ සභාවේ සැසි හතරක් VI වන පාවුළු ශ්‍රවණාගාරයේදී පැවැත්වුණු අතර, ලෝකයේ සහ කතෝලික සභාවේ වත්මන් තත්ත්වය, සාමය ප්‍රවර්ධනය, සංගමන ක්‍රියාවලිය සහ “Magnifica Humanitas” නමැති පාප් වහන්සේගේ නව ආගමික ලේඛනය පිළිබඳව එහිදී සාකච්ඡා කෙරිණි.

සිය දීර්ඝ දේවගැති සේවා අත්දැකීම් පදනම් කරගනිමින් මැල්කම් කාදිනල් රංජිත් හිමිපාණන් ද අදාළ කරුණු සම්බන්ධයෙන් සිය අදහස් පාප් වහන්සේ සහ අනෙකුත් කාදිනල්වරුන් සමඟ හුවමාරු කරගෙන තිබේ.

රටවල් රැසක් නියෝජනය කරමින් කාදිනල්වරුන් 178 දෙනෙකු මෙම විශේෂ සභාවට එක්ව සිටි අතර, එහි සමාප්ති අවස්ථාව ලෙස ජුනි 29 දින ශාන්ත පේදුරු සහ ශාන්ත පාවුළු අපෝස්තුළුවරුන්ගේ මංගල්‍යය නිමිත්තෙන් පාප් වහන්සේගේ ප්‍රධානත්වයෙන් විශේෂ දිව්‍ය පූජාවක් ද පවත්වා ඇත.