ජූලි මාසයේ දී මහ බැංකුව බරටම ඩොලර් අරන්

දේශීය විදේශ විනිමය වෙළෙඳපොළ වෙතින් පසුගිය ජූලි මාසයේ දී ශ්‍රී ලංකා මහ බැංකුව විසින් ඩොලර් මිලියන 348.6ක ප්‍රමාණයක් මිල දී ගෙන ඇති බව වාර්තා වේ. 2026 පෙබරවාරි මාසය තුළ දී මහ බැංකුව විසින් ඩොලර් මිලියන 461ක් දේශීය විදේශ විනිමය වෙළෙඳපොළෙන් මිල දී ගෙන තිබුණු අතර ඉන් පසු ඉහළම ඩොලර් මිල දී ගැනීමක් සිදුකළ මාසය ලෙසින් පසුගිය ජූලි මාසය සැලකිය හැකි වේ.

මේ සමඟම වසරේ මුල් මාස 07 තුළ දී මහ බැංකුව මිල දී ගෙන ඇති ඩොලර් ප්‍රමාණය ඩොලර් මිලියන 1,331ක් වේ. තවද මෙම වකවානුව තුළ දී මහ බැංකුව වෙළෙඳපොළ වෙත ඩොලර් මිලියන 426ක් අලෙවි කර ඇත.

ඒ අනුව 2026 ජනවාරි – ජූලි කාලපරිච්ඡේදය තුළ දී මහ බැංකුව දේශීය විදේශ විනිමය වෙළෙඳපොළෙන් ශුද්ධ වශයෙන් මිල දී ගෙන ඇති ඩොලර් ප්‍රමාණය ඩොලර් මිලියන 905ක් වේ.

මේ අතර 2026 ජූලි මාසය අවසන් වන විට මෙරට නිල සංචිත වත්කම් ප්‍රමාණය ඩොලර් මිලියන 6,591ක් බව ශ්‍රී ලංකා මහ බැංකුව වැඩිදුරටත් සඳහන් කරයි. 2026 ජූනි මාසය අවසන් වන විට මෙම අගය සඳහන් වූයේ ඩොලර් මිලියන 6,458ක් ලෙසිනි.