රැල්ලට AIවලින් පින්තුර හදලා ෆේස්බුක් එකේ දැම්මාද? එහෙනම් මේ අනතුර ගැනත් දැනගන්න

මෑත කාලීනව ෆේස්බුක් ඇතුළු සමාජ මාධ්‍ය ජාලාවල කෘත්‍රිම බුද්ධිය (AI) භාවිතා කරමින් තමන්ගේම නිර්මාණාත්මක ඡායාරූප සකස් කර පළ කිරීමේ විශාල ප්‍රවණතාවක් දක්නට ලැබේ.

පුද්ගලීකරණය කරන ලද ඩිජිටල් කැරිකේචර් (Personalized digital caricature) ලෙස හැඳින්වෙන මෙම රූප රාමු මගින් පුද්ගලයෙකුගේ වෘත්තිය, විනෝදාංශ සහ පෞරුෂය එකම රූපයකට ගොනු කර පෙන්වනු ලබයි.

කෙසේ වෙතත්, මෙම විනෝදාත්මක ක්‍රියාවලිය පිටුපස දැවැන්ත පෞද්ගලික දත්ත අවදානමක් පවතින බව විෂය ප්‍රාමාණිකයකු වන හරිත දහනායක මහතා පෙන්වා දෙයි.

ඔහු පවසන පරිදි, මෙවැනි AI මෘදුකාංග වෙත ඔබේ ඡායාරූපයක් ලබා දුන් විට, එම ආයතනයට ඔබේ රුව ගබඩා කර ගැනීමටත්, එය ඔවුන්ගේ AI පද්ධති පුහුණු කිරීම සඳහා යොදා ගැනීමටත් නිරායාසයෙන්ම අවසර හිමි වේ.

මෙහි ඇති බරපතලම තර්ජනය වන්නේ ඔබේ මුහුණේ ජෛවමිතික දත්ත (Biometric Data) හෙවත් ඇස් අතර පරතරය සහ හනුවේ හැඩය වැනි වෙනස් කළ නොහැකි සුවිශේෂී මිනුම් එම පද්ධති තුළ සටහන් වීමයි. මුරපදයක් (Password) මෙන් නොව, ඔබේ මුහුණේ ලක්ෂණ වෙනස් කළ නොහැකි බැවින් මෙවැනි දත්ත සොරාගැනීමකට ලක්වීම ජීවිත කාලයටම බලපාන තර්ජනයක් විය හැකිය.

මීට අමතරව, මෙම රූප සැකසීමට ලබා දෙන තොරතුරු හරහා පුද්ගලික පැතිකඩක් (Profile) නිර්මාණය කිරීමට වංචාකරුවන්ට අවස්ථාව ලැබේ. “මම ක්‍රිකට් වලට කැමති නීතිඥයෙක්” වැනි විස්තර හරහා ඔබව ඉලක්ක කරගත් සයිබර් ප්‍රහාර (Phishing) එල්ල කිරීමට ඔවුන්ට මග පෑදේ.

විශේෂයෙන්ම කුඩා ජංගම දුරකථන යෙදුම් (Apps) ඔබේ දත්ත ප්‍රචාරණ ආයතන වෙත විකිණීමේ අවදානමක් ද පවතී. අපගේ තොරතුරු ස්වකැමැත්තෙන්ම මෙවැනි දත්ත ගබඩාවලට (Databases) ලබා දීම මගින් ඉදිරියේදී රූපයක් දුටු පමණින් ඕනෑම අයෙකුගේ සම්පූර්ණ ඉතිහාසයම අනාවරණය කර ගැනීමේ හැකියාව AI පද්ධති සතු වන බවට හරිත දහනායක මහතා අනතුරු අඟවයි.