මෝටර් රථ ප්‍රවාහන දෙපාර්තමේන්තුවට නව කොමසාරිස් ජනරාල්වරයෙක් පත් කෙරේ

මෝටර් රථ ප්‍රවාහන දෙපාර්තමේන්තුවේ නව කොමසාරිස් ජනරාල්වරයා ලෙස ශ්‍රී ලංකා ගුවන් හමුදාවේ එයාර් වයිස් මාර්ෂල් (විශ්‍රාමික) තුෂාර ඉදුනිල් ප්‍රනාන්දු මහතා පත්කර තිබේ.

අභිනව කොමසාරිස් ජනරාල්වරයා සිය නිල රාජකාරි ආරම්භ කිරීම අද (01) පෙරවරුවේ කොළඹ 05, ඇල්විටිගල මාවතේ පිහිටි මෝටර් රථ ප්‍රවාහන දෙපාර්තමේන්තු ප්‍රධාන කාර්යාලයේදී සිදු කෙරිණි.

ප්‍රවාහන හා මහාමාර්ග නියෝජ්‍ය අමාත්‍ය වෛද්‍ය ප්‍රසන්න ගුණසේන මහතාගේ ප්‍රධානත්වයෙන් සහ හුණුපිටිය ගංගාරාම විහාරාධිපති අතිපූජ්‍ය කිරින්දේ අස්සජි නාහිමිපාණන් වහන්සේ ප්‍රමුඛ මහා සංඝරත්නයේ ආගමික වතාවත් මධ්‍යයේ මෙම කටයුතු සංවිධානය කර තිබුණි.