“මාව අත්අඩංගුවට ගන්න එපා” – ශිරන්ති රාජපක්ෂ අපේක්ෂිත ඇපයක් ඉල්ලයි

හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය විසින් අපේක්ෂිත ඇප ඉල්ලා අධිකරණයට අයැදුම්පතක් ඉදිරිපත් කර තිබෙනවා.

ඒ ප්‍රකාශයක් ලබාදීම සඳහා මූල්‍ය අපරාධ විමර්ශන කොට්ඨාසය (FCID) වෙත පැමිණෙන ලෙස දැනුම් දී ඇති පසුබිමකයි.

ඒ අනුව, ඕනෑම ඇප කොන්දේසියක් යටතේ තමන් ඇප මත මුදාහරින ලෙසයි ඇය අධිකරණයෙන් ඉල්ලා ඇත්තේ.

රෝගී තත්ත්වයක් හේතුවෙන් මේ වනවිට විදෙස්ගතව ප්‍රතිකාර ලබමින් සිටින ශිරන්ති රාජපක්ෂ මහත්මිය වෙනුවෙන් මෙම අපේක්ෂිත ඇප අයැදුම්පත අද (05) මාලිගාකන්ද මහේස්ත්‍රාත් අධිකරණයට ඉදිරිපත් කර තිබෙනවා.

එම ඉල්ලීම මාලිගාකන්ද මහේස්ත්‍රාත් ජනනි පෙරේරා මහත්මිය ඉදිරියේ අද කැඳවනු ලැබුවා.

නීතිඥ ජයබාලන් මහතා මගින් මෙම පැමිණිල්ල ඉදිරිපත් කර ඇති අතර, එහි වගඋත්තරකරු ලෙස අපරාධ පරීක්ෂණ දෙපාර්තමේන්තුවේ (CID) අධ්‍යක්ෂවරයා නම් කර තිබෙනවා.

එමෙන්ම, පැමිණිලිකාරිය ලෙස මේරි ලුවිස් ශිරන්ති රාජපක්ෂ යන නම සඳහන් කර තිබෙනවා.

විදෙස්ගතව සිට යළි ශ්‍රී ලංකාවට පැමිණීමේදී තමන් පොලිසිය විසින් ගුවන්තොටුපොළේදී අත්අඩංගුවට ගැනීමට ඉඩ ඇති බවට ඇය සිය පැමිණිල්ල මගින් පෙන්වා දී තිබෙනවා.

ඒ හේතුවෙන් තමන් අත්අඩංගුවට ගැනීමක් සිදුවුවහොත් ඕනෑම ඇප කොන්දේසියක් යටතේ ඇප මත මුදාහරින ලෙසයි ශිරන්ති රාජපක්ෂ මහත්මිය අධිකරණයෙන් ඉල්ලා ඇත්තේ.