මහ බැංකු සතු විදෙස් සංචිතයේ පහත වැටීමක්

2026 අප්‍රේල් මාසය තුළදී ශ්‍රී ලංකා මහ බැංකුව සතු නිල සංචිත වත්කම් වටිනාකම යළිත් ඇමෙරිකානු ඩොලර් බිලියන 7 මට්ටමින් පහළ වැටී තිබේ.

මහ බැංකුව නිකුත් කළ නවතම දත්ත අනුව, 2026 මාර්තු මාසය අවසානයේ ඩොලර් මිලියන 7,026ක් ලෙස වාර්තා වූ සමස්ත නිල සංචිත වත්කම් ප්‍රමාණය, අප්‍රේල් මාසය අවසන් වන විට ඩොලර් මිලියන 6,759ක් දක්වා පහළ ගොස් ඇත.

සංචිත වත්කම්වල ප්‍රධාන සංරචකය වන විදේශ විනිමය සංචිතයද අප්‍රේල් මාසය තුළ ඩොලර් මිලියන 6,800 සිට ඩොලර් මිලියන 6,505 දක්වා පහත වැටී ඇති බව දත්ත පෙන්වා දෙයි.

එමෙන්ම මහ බැංකුව සතු රන් සංචිතයද ඩොලර් මිලියන 222 සිට ඩොලර් මිලියන 219 දක්වා අඩු වී තිබේ.

වසර පහහමාරකට පසු ප්‍රථම වරට 2026 පෙබරවාරි මාසයේදී ශ්‍රී ලංකාවේ නිල සංචිත වත්කම් ඇමෙරිකානු ඩොලර් බිලියන 7 සීමාව ඉක්මවා ගිය අතර, එම මාසය අවසානයේ එය ඩොලර් මිලියන 7,284ක් ලෙස වාර්තා විය.

කෙසේවෙතත්, මාර්තු මාසයේදී එය ඩොලර් මිලියන 7,026 දක්වා සියයට 3.5කින් පහළ ගොස් තිබූ අතර, ඒ අනුව අඛණ්ඩව දෙවන මාසයටත් නිල සංචිත පහළ යාමක් අප්‍රේල් මාසයේදී වාර්තා වී තිබේ.