මහ බැංකු තීරණයෙන් පසු ඩොලරයේ සිදු වූ වෙනස

ශ්‍රී ලංකා මහ බැංකුව විසින් ප්‍රකාශයට පත් කරන ලද දෛනික විනිමය අනුපාතික සටහනට අනුව අද දිනයේ දී ශ්‍රී ලංකා රුපියල එක්සත් ජනපද ඩොලරයට සාපේක්ෂව කැපීපෙනෙන ලෙස අතිප්‍රමාණය වී ඇති බව නිරීක්ෂණය වේ.

ඒ අනුව ඩොලරයේ ගැනුම් මිල රු. 332.38 සිට රු. 324.66ක් දක්වා අඩු වී ඇති අතර විකුණුම් මිල රු. 342.08 සිට රු. 335.39ක් දක්වා සුවිශේෂී ලෙස පහළ ගොස් තිබේ.

අපනයනකරුවන්හට සිය අපනයන ඉපැයීම් මෙරටට ගෙන්වා ගැනීමෙන් පසු ඒවා රුපියල් බවට පරිවර්තනය කර ගැනීම සඳහා දී තිබූ කාලය මාස 03 සිට මාස 01ක් දක්වා අඩු කරමින් ශ්‍රී ලංකා මහ බැංකුව විසින් ඊයේ (09) දින අතිවිශේෂ ගැසට් පත්‍රයක් නිකුත් කරනු ලැබූ අතර ඒ අනුව ඕනෑම මාසයක් තුළ, අපනයන ඉපැයීම් ශ්‍රී ලංකාවට ගෙන්වා ගන්නා සෑම භාණ්ඩ අපනයනකරුවෙකුම, ශ්‍රී ලංකාවට ලැබෙන එම ආදායමෙන් ගැසට් පත්‍රයේ සඳහන් අවසරලත් ගෙවීම් සඳහා පමණක් භාවිතයෙන් අනතුරුව, ශේෂය එළැඹෙන මාසයේ දහවන (10) දින හෝ ඊට ප්‍රථම රුපියල් බවට අනිවාර්යයෙන් පරිවර්තනය කළ යුතු වනු ඇත.