රුමේෂ් තරංග ක්‍රීඩාවට සමුදෙන දිනය

2028 සහ 2032 ඔලිම්පික් ක්‍රීඩා උළෙල සඳහා අනිවාර්යයෙන්ම සහභාගී වීමටත්, 2036 වසරේ ඉන්දියාවේ පැවැත්වීමට නියමිත ඔලිම්පික් උළෙලේදී සිය ක්‍රීඩා දිවියට සමුදීමටත් තමන් බලාපොරොත්තු වන බවත්, ලෝක ජැවලින් ශූර රුමේෂ් තරංග පවසනවා.

ඒ, ඊයේ (17) පැවති ලේඛක චූලාභය ශාන්ත කුමාර හේරත් මහතා විසින් රචිත ‘අධිෂ්ඨානයේ රන් සලකුණ’ කෘතිය ජනගත කිරීමේ උත්සවයට එක්වෙමින්.

රුමේෂ් තරංග කිසිවෙකුගේ පෞද්ගලික අයිතියක් නොව ශ්‍රී ලංකාවට අයත් ජාතික සම්පතක් ලෙස සැලකිය යුතු බව අමාත්‍ය සුනිල් කුමාර ගමගේ මහතා එහිදී සඳහන් කළා.

රුමේෂ් තරංග විසින් ශ්‍රී ලංකාවේ නාමය ලෝකය තුළ තවදුරටත් ඉදිරියට ගෙන යමින්, මෙරට ඉතිහාසයේ පළමු ඔලිම්පික් රන් පදක්කම දිනා දෙනු ඇතැයි බලාපොරොත්තු වන බවද අමාත්‍යවරයා පැවසුවා.

මේ අතර, රුමේෂ් තරංග වෙනුවෙන් කෘතියක් රචනා කිරීමට හේතුව පිළිබඳව අදහස් දක්වමින් ඔහුගේ පියා සඳහන් කළේ, තමන්ගේ ජීවිත කාලය තුළ තවත් රුමේෂ් තරංගලා දෙදෙනෙකු හෝ තිදෙනෙකු බිහිකිරීම තම අරමුණ බවයි.