නුවරඑළියේදී බස් රථ දෙකක් මුහුණට මුහුණ ගැටී අනතුරක්

නුවරඑළිය – තලවාකැලේ (A7) ප්‍රධාන මාර්ගයේ නානුඔය, ඩෙස්පෝඩ් ප්‍රදේශයේදී අද (නොවැම්බර් 14) පෙරවරුවේ බස් රථ දෙකක් එකිනෙක ගැටීමෙන් සිදුවූ මාරක රිය අනතුරකින් පුද්ගලයින් 28 දෙනෙකු තුවාල ලබා තිබේ.

තුවාල ලැබූ පිරිස ප්‍රතිකාර සඳහා කඩිනමින් නුවරඑළිය දිස්ත්‍රික් මහ රෝහල වෙත ඇතුළත් කිරීමට පියවර ගෙන ඇත.

පොලිස් වාර්තාවලට අනුව, අනතුරට ලක්වූ එක් බස් රථයක් නුවරඑළිය දෙසට ධාවනය වී ඇති අතර, ප්‍රතිවිරුද්ධ දිශාවෙන් පැමිණි අනෙක් බස් රථය නුවරඑළිය සිට අගරපතන දක්වා ධාවනය වෙමින් තිබියදී මෙම ගැටීම සිදුව තිබේ.

සිද්ධිය සම්බන්ධයෙන් නානුඔය පොලිසිය වැඩිදුර විමර්ශන කටයුතු මෙහෙයවයි.