බුලත්සිංහල රෙදිපිළි අලෙවිසැලකින් මළ සිරුරු 2ක් හමුවෙයි

බුලත්සිංහල, ඈගල්ල පාර ප්‍රදේශයේ පිහිටි රෙදිපිළි අලෙවි සැලක් තුළ තිබී අඹුසැමි යුවළකගේ මළ සිරුරු දෙකක් ඊයේ (14) දින අභිරහස් ලෙස සොයාගෙන තිබේ.

බුලත්සිංහල පොලීසියට ලද හදිසි තොරතුරක් මත වහාම ක්‍රියාත්මක වූ නිලධාරීන් කණ්ඩායමක් අදාළ ස්ථානයට ගොස් පරීක්ෂණ පවත්වා ඇත. එහිදී වෙළඳසැල තුළ තිබී මෙම මළ සිරුරු දෙක සොයාගත් බව පොලීසිය පවසයි.

මෙලෙස අභිරහස් ලෙස මියගොස් ඇත්තේ 55 හැවිරිදි කාන්තාවක් සහ ඇයගේ 61 හැවිරිදි සැමියාය.

මරණයට හේතුව මෙතෙක් අනාවරණය වී නොමැති අතර, මෙය ඝාතනයක්ද නැතහොත් වෙනත් හේතුවක් මත සිදුවූවක්ද යන්න සෙවීම සඳහා බුලත්සිංහල පොලීසිය විසින් පුළුල් විමර්ශනයක් ආරම්භ කර ඇත.