අඩි 1450 ක් ඉහළට නැඟ, විවාහ යෝජනාවක් කළ රුසියානු යුවළක් පොලිස් අත්අඩංගුවට

නිව්යෝර්ක් නුවර පිහිටි ලොව සුප්‍රකට ‘එම්පයර් ස්ටේට්’ (Empire State) ගොඩනැගිල්ලේ මුදුනටම අනවසරයෙන් නැඟ, එහිදී විවාහ යෝජනාවක් ඉදිරිපත් කළ යුවළක් නිව්යෝර්ක් පොලිසිය විසින් අත්අඩංගුවට ගෙන තිබේ.

මෙලෙස අත්අඩංගුවට පත්ව ඇත්තේ ලොව පුරා මෙවැනි අවදානම් සහගත නැගීම් (Stunts) සිදුකිරීම සම්බන්ධයෙන් ප්‍රසිද්ධියක් උසුලන සහ 2024 වසරේ නිකුත් වූ ‘Skywalkers: A Love Story’ වාර්තා චිත්‍රපටයට පාදක වූ, 33 හැවිරිදි ඇන්ජෙලා නිකොලාවු (Angela Nikolau) සහ 32 හැවිරිදි අයිවන් බීර්කස් (Ivan Beerkus) යන රුසියානු ජාතික යුවළයි.

අඩි 1,454 ක් උසැති මෙම ගොඩනැගිල්ලේ ඉහළටම නැඟි මොවුන් දෙදෙනා, “බලයට ඇති ආදරය පරදා ආදරයේ බලය ජයගන්නා දිනට ලෝකය සාමය අත්විඳිනු ඇත” යනුවෙන් සඳහන් විශාල බැනරයක් ප්‍රදර්ශනය කළහ.

ඉන්පසු ඇන්ටනාවෙන් මඳක් පහළ වේදිකාවකට පැමිණි අයිවන් බීර්කස් ,ඇන්ජෙලා වෙත විවාහ යෝජනාවක් ඉදිරිපත් කරමින් මුද්දක් පැළඳවූ අතර, දෙදෙනා සිපගනිමින් එය සමරනු ලැබීය.

ඔවුන් විනාඩි 10 කට ආසන්න කාලයක් මෙම කුළුණ මුදුනේ රැඳී සිටිමින් මේ පිළිබඳ දර්ශන සමාජ මාධ්‍ය වෙත ද මුදාහැර තිබුණි.

ගොඩනැගිල්ලෙන් පහළට බැසීමෙන් පසු පොලිස් භාරයට ගත් මෙම යුවළට එරෙහිව නීතිවිරෝධී ලෙස ඇතුළු වීම, නොසැලකිලිමත් ලෙස ජීවිත අවදානමක හෙළීම, සහ මහජන පීඩාව යන චෝදනා යටතේ නඩු පවරා ඇත.

එම්පයර් ස්ටේට් ගොඩනැගිල්ලේ ප්‍රකාශකයෙකුට අනුව, මෙම අනවසර ඇතුළු වීම නිසා එහි සිටි නරඹන්නන්ට හෝ අමුත්තන්ට කිසිදු අනතුරක් සිදුව නොමැත.