ග්‍රීක බැඳුම්කර සිද්ධිය පිළිබඳව අජිත් නිවාඩ් කබ්රාල්ට එරෙහිව යළිත් අධි චෝදනා ගොනු කරයි

ග්‍රීසිය ආර්ථික වශයෙන් බිඳ වැටෙමින් පැවති 2012 වසරේදී එරට බැඳුම්කරවල ශ්‍රී ලංකා රජයට අයත් රුපියල් බිලියන 1.84ක් ආයෝජනය කර රජයට අලාභයක් සිදු කළ බවට චෝදනා කරමින් හිටපු මහ බැංකු අධිපති අජිත් නිවාඩ් කබ්රාල් මහතාට එරෙහිව අල්ලස් කොමිසම විසින් කොළඹ මහාධිකරණය හමුවේ යළිත් අධිචෝදනා ගොනු කර තිබේ.

මෙම සිද්ධියට අදාළව මීට පෙරද අල්ලස් කොමිසම විසින් ඒ මහතාට එරෙහිව නඩු පවරා තිබුණි. එහිදී අල්ලස් කොමිසම කළ ඉල්ලීමකට අනුව, අදාළ පාඩුව යළි ශ්‍රී ලංකා මහ බැංකුවට ගෙවිය යුතු බවට වූ කොන්දේසියක් මත අධිකරණය විසින් ඔහුව මුදා හැරීමට පියවර ගෙන තිබිණි.

එහෙත්, අධිකරණය පැනවූ අදාළ කොන්දේසිය ප්‍රකාරව රුපියල් බිලියන 1.84ක මුදල මෙතෙක් රජයට ආපසු නොගෙවීම හේතුවෙන් අල්ලස් කොමිසම විසින් මෙම නව අධිචෝදනා ගොනු කර ඇත.

ග්‍රීක ආර්ථික අර්බුදය ලෝක ප්‍රකටව පැවති අවධියක මහ බැංකු අධිපතිවරයා ලෙස දරනු ලැබූ වගකීම පැහැර හැරීම සහ රජයේ මූල්‍ය ආරක්ෂාව නොසලකා හැරීම සම්බන්ධයෙන් මෙහිදී ඔහුට චෝදනා එල්ල වේ.