විමල් වීරවංශ අනිද්දා මධ්‍යම අපරාධ විමර්ශන කාර්යාංශයට

අධිකරණයට අපහාස වන ආකාරයේ ප්‍රකාශයක් සිදු කළ බවට එල්ල වී ඇති චෝදනාවක් සම්බන්ධයෙන් සිදුකරන විමර්ශනයකට අදාළව ප්‍රකාශයක් ලබාගැනීම සඳහා අමාත්‍ය විමල් වීරවංශට මධ්‍යම අපරාධ විමර්ශන කාර්යාංශය කැදවීමක් සිදුකර තිබෙනවා.

ඒ අනුව, සිකුරාදා පෙරවරු 10.00ට මධ්‍යම අපරාධ විමර්ශන කාර්යාංශය හමුවේ පෙනී සිට ප්‍රකාශයක් ලබාදෙන ලෙස ඔහුට දැනුම් දී ඇති බවයි වාර්තා වන්නේ.

ශ්‍රී ලංකා පොදුජන පෙරමුණ විසින් අනුරාධපුරයේදී පවත්වන ලද රැස්වීමකදී විමල් වීරවංශ අධිකරණයට අපහාසවන ආකාරයේ ප්‍රකාශයක් සිදු කළ බවට පොලිස්පතිවරයා වෙත පැමිණිල්ලක් ලැබී තිබුණා.

එම පැමිණිල්ලට අනුව, අදාළ සිද්ධිය සම්බන්ධයෙන් මධ්‍යම අපරාධ විමර්ශන කාර්යාංශය විසින් විමර්ශන ආරම්භ කර ඇති අතර, එහි කොටසක් ලෙස ඔහුගෙන් ප්‍රකාශයක් ලබාගැනීමට නියමිතයි.