ගොවීන්ගේ මිලියන 250කට විද රට පනින්න සැරසෙන මූල්‍ය ආයතන හිමිකරු

ගලෙන්බිඳුණුවැව හා හොරොව්පොතාන ප්‍රදේශයේ ගොවි ජනතාවගේ රුපියල් කෝටි විසිපහකට අධික මුදලක් වංචා කළ මූල්‍ය සමාගමකට එරෙහිව ජාතික ගොවි ජන එකමුතුව කොළඹ අපරාධ පරීක්ෂණ දෙපාර්තමේන්තුවට ඊයේ (සැප්. 27) පැමිණිලි කර තිබේ.

ගොවි ජනතාව තැන්පත් කළ මුදල් නැවත ඉල්ලීමට ගිය අවස්ථාවේදී මූල්‍ය ආයතනයේ හිමිකරු ගොවීන්ට මුදල් නොදී ප්‍රදේශයෙන් පළා ගොස් සැඟවී සිටින බව ජාතික ගොවි ජන එකමුතුවේ සභාපති අනුරාධ තෙන්නකෝන් පැවසීය.

මේ සම්බන්ධව එම ප්‍රදේශයේ පොලිස් ස්ථානවලට ගොවීන් පැමිණිලි කිරීමට ගියද පැමිණිලි භාර නොගන්නා බවයි සභාපතිවරයා පවසන්නේ.

“පොලිසියට කරන්න දෙයක් නෑ. තම තමන් එම ගැටලුව බලාගන්නා,” ලෙසට රඹෑව ඇතුළු පොලිස් ස්ථාන ගොවීන්ට දැනුම් දී තිබෙන බව තෙන්නකෝන් මහතා වැඩිදුරටත් පවසනවා.

එම මූල්‍ය ආයතන හිමිකරු බිරිය සහ දරු දෙදෙනා සමග ඔහු විදේශ ගතවීමට ලිපි ලේඛන සකස් කරමින් සිටින බවට තොරතුරු ලැබී තිබෙන බවත් එම පැමිණිල්ල එකී පොලිස් ස්ථාන පැමිණිල්ල භාර නොගැනීම නිසාවෙන් කොළඹ අපරාධ විමර්ශන කොට්ඨාසයට පැමිණිලි කළ බව පැවසූ හෙතෙම ගොවීන් පත්ව ඇති අසරණභාවය සලකා මෙම මූල්‍ය ආයතනයේ ප්‍රධානියාගේ විදේශ ගමන් තහනම් කර අත්අඩංගුවට ගෙන විමර්ශනයක් සිදු කරන ලෙස අපරාධ පරීක්ෂණ දෙපාර්තමේන්තුවෙන් ඉල්ලා සිටි බව සඳහන් කළේ ය.