උඩුවේ ධම්මාලෝක හිමි අත්අඩංගුවට ගන්නා ලෙස නියෝගයක්

අධිකරණයේ විභාග වන නඩුවක විත්තිකරු ලෙස නම් කර ඇති උඩුවේ ධම්මාලෝක හිමියන් අධිකරණය හමුවේ පෙනී නොසිටීම හේතුවෙන් අත්අඩංගුවට ගැනීමේ වරෙන්තුවක් අද (28) කොළඹ ප්‍රධාන මහේස්ත්‍රාත් අධිකරණය විසින් නිකුත් කරන ලදී.

උන්වහන්සේ වැඩ සිටින කිරුලපන ඇලන් මැතිනියාරාම විහාරයේ, ශබ්ද විකාශන යන්ත්‍ර අධික ශබ්දයෙන් අලුයම් කාලයේදී භාවිතා කරන බවට එල්ල වී ඇති චෝදනා හේතුවෙන් ඒ ආසන්නයේ පදිංචි වී සිටි අමාත්‍යවරයෙකු හා දැනට ඉන්දියාවේ මහ කොමසාරිස් ලෙස කටයුතු කරන මිලින්ද මොරගොඩ, පාරිසරික යුක්ති කේන්ද්‍රය ඇතුළු පාර්ශව හයක් විසින් පෞද්ගලික පැමිණිල්ලක් ලෙස මෙම නඩුව ගොනු කර තිබේ.

කොළඹ අතිරේක මහේස්ත්‍රාත්වරයා හමුවේ නඩුව කැඳවූ අවස්ථාවේ දී ධම්මාලෝක හිමියන් අධිකරණයට පැමිණ නො සිටි අතර නඩුව එළඹෙන ඔක්තෝබර් 31 වැනිදා යළි කැඳවීමට ද තීරණය කෙරුණි.