වන අලියෙකු පිළිස්සීමේ සිද්ධියට අත්අඩංගුවට ගත් සැකකරුවන්ට අධිකරණයෙන් දුන් නියෝගය

සීප්පුකුලම ප්‍රදේශයේ දී වන අලියෙකු පිළිස්සීමේ සිද්ධිය සම්බන්ධයෙන් අත්අඩංගුවට ගත් සැකකරුවන් මේ මස 24 වැනිදා දක්වා රක්ෂිත බන්ධනාගාරගත කරන ලෙස අනුරාධපුර මහේස්ත්‍රාත්වරයා නියෝග කර තිබෙනවා.

වන අලියා ගින්නෙන් පුළුස්සා හිංසා කරන අයුරු දැක්වෙන වීඩියෝ පටයක් සමාජ මාධ්‍යයේ සංසරණය වූ අතර, එම සිද්ධිය සම්බන්ධයෙන් සිදුකළ විමර්ශනයේ දී එම ප්‍රදේශයේම පදිංචි අවුරුදු 42, 48 සහ 50 යන වයස්වල සැකකරුවන් තිදෙනෙකු මිහින්තලය පොලීසිය විසින් අත්අඩංගුවට ගෙන තිබුණා.

මෙම වන අලියා සීප්පුකුලම ප්‍රදේශයේ දී මියගොස් සිටි අතර, සිදුකරන ලද පශ්චාත් මරණ පරීක්ෂණයේ දී වකුගඩු හා අක්මාවේ ඇති වූ රෝගී තත්ත්වය හා පිළිස්සීමෙන් භීතියට පත්වීම යන කරුණු මරණයට පත්ව ඇති බවට නිගමනය කර තිබෙනවා.