Apple සමාගමෙන් iPhone පරිශීලකයින්ට හදිසි ආරක්ෂක අනතුරු ඇඟවීමක්

Apple සමාගම විසින් iPhone භාවිතාකරුවන්ට සිය උපාංග වහාම යාවත්කාලීන කරන ලෙස හදිසි ආරක්ෂක අනතුරු ඇඟවීමක් නිකුත් කර තිබෙනවා.

Apple සමාගම පවසන්නේ, “ඉතා සංකීර්ණ” ලෙස විස්තර කළ සයිබර් ප්‍රහාරයන්හිදී සිදුවිය හැකි බරපතළ මෘදුකාංග දුර්වලතා දෙකක් හඳුනාගෙන ඇති බවයි.

මෙම සතියේ නිකුත් කළ ආරක්ෂක නිවේදනයකට අනුව, මෙම දෝෂය Safari විසින් භාවිතා කරන බ්‍රව්සර් එන්ජිම වන WebKit බ්‍රව්සර් එන්ජිම සහ iOS හි සියලුම තෙවන පාර්ශවීය බ්‍රව්සර් වලට මෙය බලපා ඇති බවයි.

මෙම දුර්වලතා හේතුවෙන්, පරිශීලකයෙකු අනිෂ්ට වෙබ් අඩවියක් නැරඹීමෙන් පමණක්, උපාංගයට හානිදායක code ක්‍රියාත්මක වීමට ඉඩ ඇති බවයි Apple සමාගම පෙන්වා දෙන්නේ.

මෙම ගැටලු නිරාකරණය කිරීම සඳහා Apple විසින් iPhone, iPad සහ අනෙකුත් Apple උපාංග සඳහා හදිසි යාවාත්කාලීන (emergency software update) කිරීමක් නිකුත් කර ඇති අතර, ආරක්ෂාව තහවුරු කර ගැනීම සඳහා එම යාවත්කාලීනය වහාම ස්ථාපනය කරන ලෙස පරිශීලකයින්ට දැඩි ලෙස උපදෙස් ලබා දී ඇති බව සඳහන්.

Apple සමාගමේ iPhone පරිශීලකයින් ගණන බිලියන 1.8කට ආසන්න වුවද, මෙම අනතුරු ඇඟවීම මගින් ඒ සියලුම උපාංග විශාල බිඳ වැටීමකට ලක්ව ඇති බවක් අර්ථ නොකෙරෙන බව සහ මෙම updates ස්ථාපනය නොකළහොත් ඇතිවිය හැකි අවදානම පිළිබඳ අවධානය යොමුකළ යුතු බවයි විශේෂඥයන් පෙන්වා දෙන්නේ.

මෙම ප්‍රහාරයන් පිටුපස සිටින පාර්ශවය හෝ ඉලක්ක වූ පුද්ගලයන් පිළිබඳ තොරතුරු Apple විසින් ආරක්ෂක හේතු මත අනාවරණය කර නොමැති අතර Apple සමාගම පවසන්නේ, මෙම සිදුවීම් සම්බන්ධයෙන් තවදුරටත් විමර්ශන සිදු කරමින් පවතින අතර, සියලුම පරිශීලකයින් තම උපාංග නවතම ආරක්ෂක updates සමඟ නිතරම යාවත්කාලීන කර තබා ගැනීම අත්‍යවශ්‍ය බවයි.