බඳින තුවක්කුවක් පත්තු වී 16 හැවිරිදි පාසල් සිසුවා බරපතල තුවාල ලබයි

බඳින තුවක්කුවත් පත්තු වී හම්බන්තොට කටුවන සියාරපිටිය මහා විද්‍යාලයේ 11 වසරේ ඉගෙනුම ලබන සිසුවෙකුගේ පාදයට බරපතළ තුවාල සිදුව තිබෙනවා.

පාසලට ආසන්නයේ පිහිටි ඉඩමක බැඳ තිබූ තුවක්කුවක් පත්තු වී සිසුවා අනතුරට ලක්ව ඇති අතර ඉඩමේ හිමිකරු කටුවන පොලීසිය අත්අඩංගුවට ගෙන ඇත.

තුවාල ලැබූ සිසුවා පාසල් ක්‍රීඩාංගණයේදී යහළුවන් සමග ක්‍රිකට් ක්‍රීඩාකර තිබුණේ ඊයේ (08) පස්වරුවේය.

එලෙස ක්‍රිඩා කරමින් සිටිය දී පන්දුව ක්‍රීඩාංගණය පිටුපස ඇති ප්‍රධාන මාර්ගයට යාබද ඉඩමට යෑම හේතුවෙන් සිසුවා එය රැගෙන ඒමට එම ස්ථානයට ගිය අවස්ථාවේ එම ඉඩමේ අටවා තිබූ බඳින තුවක්කුවක් පත්තු වී සිසුවාගේ දකුණ කකුලට තුවාල සිදුවී තිබේ.

ඇඹිලිපිටිය දිස්ත්‍රික් මහ රෝහලට ඇතුළත් කළ සිසුවා අද (09) උදෑසන ශල්‍යකර්මයකටද ලක්කෙරුණි.