ගැබිණි ගුරුතුමියගේ ඉරණම අවාසනාවන්ත අයුරින් විසදෙයි

කහටගස්දිගිලිය, රත්මල්ගහ වැව ප්‍රධාන මාර්ගයේ යතුරුපැදියක් හා බස් රථයක් මුහුණට මුහුණ ගැටීමෙන් සිදුවූ අනතුරකින් ගැබිනි කාන්තාවක් ජීවිතක්ෂයට පත්ව තිබේ.

23 හැවිරිදි අදාළ කාන්තාවගේ සැමියා බරපතළ තුවාල ලබා රෝහල්ගත කර ඇති බව කහටගස්දිගිලිය පොලීසිය පැවසීය.

ඊයේ (08) දහවල් 2.30ට පමණ රාජකාරී අවසන් කර සැමියා සමග නිවෙස බලා යමින් සිටිය දී මැදවච්චියේ සිට පැමිණි ලංගම බස් රථයක මුහුණට මුහුණ ගැටී අනතුර සිදුව තිබුණි.

මියගිය කාන්තාව කහටගස්දිගිලිය මුස්ලිම් මහා විද්‍යාලයේ ගුරුවරියක් වන අතර කහටගස්දිගිලිය කිරිඉබ්බැව ප්‍රදේශයේ පදිංචි කාන්තාවකි.

බරපතළ තුවාල ලබා සිටි මියගිය කාන්තාවගේ සැමියා කහටගස්දිගිලිය රෝහලට ඇතුළු කිරීමෙන් පසු වැඩිදුර ප්‍රතිකාර සඳහා මේ වනවිට අනුරාධපුර ශික්ෂණ රෝහලට මාරු කර යවා තිබේ.

අනතුර සම්බන්ධයෙන් වැඩිදුර පරීක්ෂණ කහටගස්දිගිලිය පොලීසිය විසින් සිදුකෙරේ.