අමෙරිකාවෙන් ඉරානයට යළිත් ප්‍රහාර 

හෝමුස් සමුද්‍ර සන්ධිය හරහා ධාවනය වූ ජාත්‍යන්තර භාණ්ඩ ප්‍රවාහන නෞකාවකට ඉරානය විසින් ඩ්‍රෝන ප්‍රහාරයක් එල්ල කිරීමට එරෙහිව, ඇමරිකානු මධ්‍යම බලඇණිය (US Central Command – CENTCOM) විසින් ඉරානයේ ප්‍රධාන හමුදා මධ්‍යස්ථාන ඉලක්ක කර ගනිමින් දැවැන්ත ගුවන් ප්‍රහාර මාලාවක් ඊයේ (27) දියත් කර ඇත.

මෙම යුදමය තත්ත්වය ආරම්භ වූයේ පසුගිය බ්‍රහස්පතින්දා (25) සිංගප්පූරු ධජය සහිත ‘Ever Lovely’ නැමැති වෙළෙඳ නෞකාවට ඉරාන හමුදාව විසින් මරාගෙන මැරෙන ඩ්‍රෝන ප්‍රහාරයක් එල්ල කිරීමත් සමඟය.

මීට ප්‍රතිචාර ලෙස අම‍ෙරිකානු මධ්‍යම බලඇණිය විසින් ඊයේ (27) දිනයේදී ඉරානයේ මිසයිල සහ ඩ්‍රෝන ගබඩා මෙන්ම වෙරළබඩ රේඩාර් මධ්‍යස්ථාන වෙත ගුවන් ප්‍රහාර එල්ල කර විනාශ කර ඇත.

අදාළ නෞකාව අනවසර මුහුදු මාර්ගයක ගමන් කිරීම නිසා ප්‍රහාරය එල්ල කළ බව ඉරානය පවසයි. 

අමෙරිකානු ප්‍රහාරයෙන් පසු, ඉරාන විප්ලවීය ආරක්ෂක බලකාය  විසින් කලාපයේ සිටින අම‍ෙරිකානු හමුදා ඉලක්ක වෙත ද ප්‍රතිප්‍රහාර එල්ල කර තිබේ.