දියවඩන නිළමේවරයා විසින් ජනපතිට පිළිගැන් වූ සන්නස් පත්‍රය

කන්ද උඩරට මහාකලා මංගල්‍යය ලෙසින් සැලකෙන මහනුවර ඇසළ පෙරහැර මෙවර සාර්ථකව නිමා වු බවට වන සන්නස් පත්‍රය ජනාධිපති අනුර කුමාර දිසානායක වෙත දියවඩන නිළමේ ප්‍රදීප් නිලංග දෑල විසින් අද පස්වරුවේ භාරදෙනු ලැබුවා.

ඒ මහනුවර ජනාධිපති මන්දිරයේ පැවති සාම්ප්‍රදායික උත්සවයේදීයි.

මෙගිදී මෙවර පෙරහරේ දක්ෂතා දැක්වූ ශිල්පීන් ඇගයීමද සිදු කළා.

මේ අතර, මෙවර කන්ද උඩරට ඇසළ පෙරහර මංගල්‍යයේ අවසාන චාරිත්‍රය වන දිය කැපීමේ මංගල්‍යය අද අළුයම යෙදුණු සුබ මොහොතින් මහවැලි ගගේ ගැටඹේ තොටේදී සිදුකෙරුණා.

එම මංගල දියවර නැවත පෙරහරකින් මහනුවර පුල්ලෙයාර් කෝවිල වෙත රැගෙන ආ අතර අස්ගිරි ගෙඩිගේ රජමහා විහාරයේ තැන්පත් කර තිබූ පෙරහර කරඬුව ශ්‍රී දළදා මාලිගාව වෙත වැඩම කරවීමේ දහවල් පෙරහර අද පස්වරු 2.16ට යෙදුණු සුබ මොහොතින් වීදි සංචාරය ආරම්භ කෙරුණා.

එහිදී පෙරහර කරඬුව ශ්‍රී දළදා මාලිගාව වෙත වැඩම කරවනු ලැබුවේ සිංහ රාජා හස්තියා විසිනුයි.