හෝමූස් අර්බුදය උත්සන්න වෙයි! අමෙරිකාව සහ ඉරානය අතර ප්‍රහාර උග්‍ර අතට!

අමෙරිකානු සහ ඉරාන හමුදා අතර මේ වනවිට දැවැන්ත මිසයිල සහ ඩ්‍රෝන ප්‍රහාර හුවමාරුවක් සිදුව ඇති බව විදෙස් මාධ්‍ය වාර්තා කරයි. හෝමූස් සමුද්‍ර සන්ධිය හරහා සිදුවන නාවික ගමනාගමනයේ පාලනය තමන් සතු කර ගැනීමට ඉරානය උත්සාහ කිරීමත් සමඟ මෙම අර්බුදකාරී තත්ත්වය උද්ගතව තිබේ.

මෙම නවතම ගැටුම් හේතුවෙන්, හෝමූස් සමුද්‍ර සන්ධිය නැවත විවෘත කිරීමට සහ තවත් දින 60ක සාකච්ඡාවලින් පසුව යුද්ධය මුළුමනින්ම අවසන් කිරීම අරමුණු කරගනිමින් පසුගිය මාසයේදී දෙරට අතර අත්සන් කරන ලද අමෙරිකා-ඉරාන අතුරු ගිවිසුමේ අනාගතය පිළිබඳව දැඩි සැක මතු වී ඇත.

මෙම තත්ත්වය සම්බන්ධයෙන් අදහස් දක්වන අමෙරිකානු මධ්‍යම අණදෙන බලඇණිය පවසන්නේ, හෝමූස් සමුද්‍ර සන්ධිය හරහා නිදහසේ ගමන් කරන සිවිල් නාවිකයන්ට සහ වාණිජ නැව්වලට ප්‍රහාර එල්ල කිරීමට ඉරානයට ඇති හැකියාව අඛණ්ඩව දුර්වල කිරීමේ අරමුණින් මෙලෙස ඉරානයට එරෙහිව ප්‍රහාර දියත් කළ බවයි. කෙසේ වෙතත්, සති අන්තයේදී අමෙරිකාව එල්ල කළ මෙම ආක්‍රමණශීලී ප්‍රහාර තරයේ හෙළා දකින බව ඉරාන විදේශ අමාත්‍යාංශය නිවේදනයක් නිකුත් කරමින් ප්‍රකාශ කරයි.

මීට අමතරව, ඉරානයේ ප්‍රධාන සාකච්ඡාකරු වන මොහොමඩ් බාකර් කලීබාෆ් ‘X’ සමාජ මාධ්‍යයේ සටහනක් තබමින්, “ඒකපාර්ශ්වික ගිවිසුම්වල යුගය අවසන්. අපි ඔබට කිව්වා: ඔබේ පොරොන්දුව රකින්න, නැත්නම් වන්දිය ගෙවන්න. යථාර්ථය දැන් අප ඉදිරියේ ඇත,” යනුවෙන් දැඩි අනතුරු ඇඟවීමක් ද සිදුකර තිබේ.

පසුගිය පෙබරවාරි 28 වැනිදා අමෙරිකාව සහ ඊශ්‍රායලය විසින් ඉරානයට එරෙහිව ආරම්භ කළ යුද්ධය හේතුවෙන්, අමෙරිකානු කඳවුරු පවතින රටවලට ඉරානය ප්‍රතිප්‍රහාර එල්ල කිරීමත් සමඟ සමස්ත ගල්ෆ් කලාපයම මේ වනවිට අස්ථාවර වී ඇත. විශේෂයෙන්ම, ඉරානය විසින් සමුද්‍ර සන්ධිය ඵලදායී ලෙස අවහිර කිරීමට පියවර ගැනීම හේතුවෙන් ලෝක වෙළෙඳපොළේ බලශක්ති මිල ගණන් සීඝ්‍රයෙන් ඉහළ ගොස් ඇති අතර, එය ගෝලීය උද්ධමනය තවදුරටත් දැඩි කිරීමට සෘජුවම බලපා තිබේ.