“මැච් ගහනකොට බොන්න එපා” – එංගලන්ත ක්‍රිකට් පිළට දැඩි අවවාද

එංගලන්ත පිරිමි ක්‍රිකට් කණ්ඩායමේ ක්‍රීඩකයින් සඳහා තරගාවලි අතරතුර මත්පැන් පානය කිරීම සහ රාත්‍රී කාලයේ එළිමහනේ රැඳී සිටීම දැඩි ලෙස සීමා කරමින් නව හැසිරීම් මාර්ගෝපදේශ මාලාවක් හඳුන්වා දී ඇති බව බ්‍රිතාන්‍යයේ සුප්‍රසිද්ධ ‘Telegraph’ පුවත්පත වාර්තා කරයි.

මීට පෙර පැවැති අළුබඳුන (The Ashes) තරග සංචාරයේදී පිටියෙන් පිටත ඇති වූ විනය ගැටලු කිහිපයක් හේතුවෙන් ක්‍රීඩකයින් සඳහා මධ්‍යම රාත්‍රී කාල සීමා නීතියක් (Midnight Curfew) පනවා තිබුණි. කෙසේ වෙතත්, එම නීතිවල පැවති අපැහැදිලිතාවන්ගෙන් රිංගා යමින් නායක බෙන් ස්ටෝක්ස් (Ben Stokes) සහ වේගපන්දු යවන ක්‍රීඩක ගස් ඇට්කින්සන් (Gus Atkinson) සම්බන්ධ කරගනිමින් රාත්‍රී සමාජශාලාවක (Nightclub) ඇති වූ ආන්දෝලනාත්මක සිදුවීමක් මාධ්‍ය මගින් අනාවරණය කළේය. මෙම තත්ත්වය සැලකිල්ලට ගනිමින් ක්‍රිකට් බලධාරීන් විසින් මෙලෙස නීති රීති තවදුරටත් දැඩි කිරීමට පියවර ගෙන ඇත.

යාවත්කාලීන කරන ලද නව ප්‍රතිපත්තියට අනුව, එංගලන්තයේදී (Home) හෝ විදෙස් සංචාරයකදී (Away) පැවැත්වෙන ඕනෑම තරගාවලියක සෑම දිනයකදීම මෙම මධ්‍යම රාත්‍රී කාල සීමා නීතිය අනිවාර්යයෙන්ම ක්‍රියාත්මක වේ.

එමෙන්ම, තරගයකට පෙර දින, තරගය පැවැත්වෙන දිනවල සහ තරගය අවසන් වූ වහාම එළඹෙන පසු දින මත්පැන් පානය කිරීමෙන් සම්පූර්ණයෙන්ම වැළකී සිටිය යුතු බවට එහි දැඩිව නිර්දේශ කර ඇත. උදාහරණයක් ලෙස, දින පහක් පුරා පැවැත්වෙන ටෙස්ට් තරගයකදී නම්, තරගය ආරම්භ වීමට පෙර දින සිට තරගය නිමවී අවසන් වන පසු දින දක්වාම (දින 7ක් පුරා) ක්‍රීඩකයින්ට මත්පැන් පානය සම්පූර්ණයෙන්ම තහනම් වනු ඇත.

මෙම නීති රීති කෙතරම් දැඩි වුවද, අවස්ථානෝචිතව අදාළ රෙගුලාසි ලිහිල් කිරීම සඳහා ප්‍රධාන පුහුණුකරු (Head Coach) බ්‍රෙන්ඩන් මැකලම් සහ ක්‍රිකට් අධ්‍යක්ෂ (Director of Cricket) රොබ් කී වෙත පූර්ණ අභිමතය සහ විශේෂ බලතල පවරා තිබීම ද විශේෂත්වයකි.