රුපියල් බිලියනයක මැණික් මල්ලට විඳින්න සැරසෙන ලොක්කා

වංචනික ආකාරයෙන් විදේශ රටකට රැගෙන යාමට උත්සාහ කරමින් සිටියදී ජාතික මැණික් හා ස්වර්ණාභරණ අධිකරණය අධිකාරිය විසින් තම භාරයට ගෙන රාජසන්තක කිරීමට නියමිතව ඇති රුපියල් බිලියනයක පමණ වටිනාකමින් යුත් මැණික් මල්ලක් නිදහස් කිරීමට එම අධිකාරියේ ඉහළ නිලධාරියෙකු කටයුතු කරමින් සිටින බව වාර්තා වේ.

පෞද්ගලික සමාගමක් විසින් අඩු තක්සේරුවක් පෙන්වා විශාල වටිනාකමකින් යුතු මෙම මැණික් තොගය විදේශ රටකට රැගෙන යාමට උත්සාහ කර ඇති අතර එහි දී අධිකාරියේ නිලධාරීන් මැදිහත් වී මෙම මැණික් මල්ල තම භාරයට ගෙන ඇත.

එවන් මැණික් වහා රාජසන්තක කිරීම සාමාන්‍ය ක්‍රමවේදය වුවද එසේ රාජසන්තක නොකර මාස තුනක පමණ කාලයක් තිස්සේ එහි නිලධාරියෙකු කල්මරමින් සිටින බවද සේවකයන් කියා සිටිති.

අධිකාරිය අධ්‍යක්ෂ මණ්ඩලයේ වැඩි බහුතරය මැණික් මල්ල රාජ සන්තක කළ යුතු බවට ස්ථිර නිගමනයක සිටි නමුත් ඉහළ නිලධාරියෙකු ඊට බාදා කරමින් සිටින බවද ඔවුන් පවසති.

අඩු තක්සේරුවක් පෙන්වා වංචනික ලෙස මැණික් විදේශ රටවලට ගෙන යාම ජාවාරමක් බවට පත්ව ඇති බවත් එලෙස රැගෙන යන මැණික් විදේශ රටවල දී අලෙවි කර එම මුදල් විදේශ බැංකුවල තැන්පත් කිරීමටත් උණ්ඩියෙල් ක්‍රමයට ලංකාවට මුදල් ගෙන ඒමටත් ඔවුන් කටයුතු කරමින් සිටිති.

මේ හේතුවෙන් මෙරටට විදේශ විනිමය නොලැබෙන මත අතර එමගින් ආර්ථිකයට ද බලපෑමක් වෙයි

source – lankacnews