වසර 15කට පසු එංගලන්ත ක්‍රිකට් කණ්ඩායම ඔස්ට්‍රේලියාවේදී ලැබූ ජය

‘අළු බඳුන’ ටෙස්ට් ක්‍රිකට් තරගාවලියේ මෙල්බර්න්හිදී ඊයේ (27) අවසන් වූ 4වන ටෙස්ට් තරගයෙන් කඩුලු 4ක ජයක් වාර්තා කිරීමට සංචාරක එංගලන්ත කණ්ඩායම සමත්විය.

දෙදිනක් තුළ අවසන් වූ මෙම තරගයේ පළමුව පන්දුවට පහරදුන් ඔස්ට්‍රේලියා කණ්ඩායම ලකුණු 152කට සියලුදෙනා දැවීගිය අතර, ඊට පිළිතුරු ලෙස එංගලන්ත පළමු ඉනිම ලකුණු 110කට සීමා විය.

අනතුරුව ඔස්ට්‍රේලියා දෙවන ඉනිම ලකුණු 132කට අවසන් වීමත් සමඟ, එංගලන්තයට ජයග්‍රහණය සඳහා ලකුණු 175ක ඉලක්කයක් හිමිවිය.

එම ඉලක්කය කඩුලු 6ක් දැවී තිබියදී සාර්ථකව පසුකර යාමට එංගලන්ත පිතිකරුවන්ට හැකිවිය.

මෙම ජයග්‍රහණය, ඔස්ට්‍රේලියාවේදී එංගලන්ත කණ්ඩායමක් වසර 15කට පසු ලැබූ පළමු ටෙස්ට් ජය ලෙස වාර්තා අතරට එක්වෙයි. එම කාලය තුළ ඔවුන් ඔස්ට්‍රේලියාවට එරෙහිව ටෙස්ට් තරග 16ක් පරාජයට පත්ව ඇති අතර, තරග 2ක් ජය–පරාජයෙන් තොරව අවසන් කරගෙන තිබුණි.

කෙසේ වෙතත්, තරග 5කින් යුත් ‘අළු බඳුන’ ටෙස්ට් තරගාවලිය මේ වන විට තරග 3–1ක් ලෙස ඔස්ට්‍රේලියා කණ්ඩායම විසින් දැනටමත් ජයග්‍රහණය කරගෙන සිටියි.