මහනුවර ජාත්‍යන්තර පාසලක හදිසි අනතුරක්! හත් හැවිරිදි දරුවෙකුට දිවි අහිමි වෙයි!

මහනුවර, මහියාව ප්‍රදේශයේ පිහිටි ජාත්‍යන්තර පාසලක සිදුවූ අවාසනාවන්ත රිය අනතුරකින් එම පාසලේම ඉගෙනුම ලබන හත් හැවිරිදි පිරිමි දරුවෙකු අද (12) දින ජීවිතක්ෂයට පත්ව තිබේ.

අද උදෑසන 11.30ට පමණ මෙම අනතුර සිදුව ඇත්තේ අදාළ පාසලේ අධ්‍යක්ෂ මණ්ඩල සාමාජිකයෙකුට අයත් වාහනයක් මගිනි. වාර්තා වන අන්දමට, අධ්‍යක්ෂවරයා සිය වාහනය පාසල් භූමියේ නවත්වා ඉන් බැස ගිය පසුව, වාහනයේ පැවති තිරිංග (Brakes) දෝෂයක් හේතුවෙන් එය එක්වරම ඉදිරියට ක්‍රියාත්මක වී තිබේ.

ඒ අවස්ථාවේදී පාසල් භූමියේ වතුර පානය කරමින් සිටි දරුවන් දෙදෙනෙකු මෙම වාහනයට යටවී ඇති අතර, බරපතල තුවාල ලැබූ එක් දරුවෙකු ජීවිතක්ෂයට පත්විය. අනතුරින් තුවාල ලැබූ අනෙක් සිසුවා මේ වන විට මහනුවර ශික්ෂණ රෝහලට ඇතුළත් කර ප්‍රතිකාර ලබමින් සිටී.

අනතුර සම්බන්ධයෙන් අදහස් දක්වමින් වාහනයේ හිමිකාර අධ්‍යක්ෂවරයා පොලිසියට පවසා ඇත්තේ තමා වාහනය නිසි පරිදි නවතා ඉන් බැස ගිය බවත්, අනතුර සිදුව ඇත්තේ ඉන් අනතුරුව බවත්ය. කෙසේ වෙතත්, වාහනයේ කාර්මික දෝෂයක් හෝ තිරිංග ක්‍රියාවිරහිත වීම මෙයට හේතුවන්නට ඇතැයි සැක කෙරේ.