ඩොනල්ඩ් ට්‍රම්ප් ලෙස අන්වර්ථ නාමයෙන් හැඳින්වූ මීහරකාව බංග්ලාදේශ රජය මැදිහත් වී බිලිදීමට පෙර බේරාගනියි

රන්වන් පැහැති රෝම හේතුවෙන් “ඩොනල්ඩ් ට්‍රම්ප්” යන අපූරු අන්වර්ථ නාමයෙන් හැඳින්වෙන බංග්ලාදේශයේ අතිශය දුර්ලභ සුදු මී හරකෙකු, ඊද් උත්සවය වෙනුවෙන් පැවැත්වීමට නියමිතව තිබූ බිලිපූජාවකින් අවසන් මොහොතේදී මුදා ගැනීමට එරට රජය මැදිහත් වී ඇති බව විදෙස් මාධ්‍ය වාර්තා කරයි.

සමාජ මාධ්‍ය කැළඹූ දුර්ලභ සත්ත්වයා

කිලෝග්‍රෑම් 700කට ආසන්න බරකින් යුත් මෙම සුවිශේෂී සත්ත්වයා, ඊද් ආගමික වතාවත් සහ බිලි පූජාවන් සඳහා මේ වන විටත් අලෙවි වී තිබුණි. සාමාන්‍ය ඊද් උත්සව මිලදී ගැනීමක් ලෙස ආරම්භ වූ මෙම සිදුවීම මුළුමනින්ම වෙනස් වූයේ, මෙම අපූරු සත්ත්වයාගේ දර්ශන ඇතුළත් වීඩියෝ පට සමාජ මාධ්‍ය ඔස්සේ වේගයෙන් සංසරණය වීමත් සමඟයි.

ඒ හරහා මෙම සත්ත්වයා කෙරෙහි මුළු රටේම අවධානය යොමු වූ අතර, බ්‍රහස්පතින්දා පැවැත්වීමට නියමිතව තිබූ උත්සවයට පෙර මහජනතාව තුළ ඒ සම්බන්ධයෙන් දැඩි උනන්දුවක් සහ කතාබහක් නිර්මාණය විය.

බලධාරීන්ගේ කඩිනම් මැදිහත්වීම

මහජන අවධානය සහ ආරක්ෂක හේතූන් මත බලධාරීන් වහාම ක්‍රියාත්මක වී ඇති අතර, බංග්ලාදේශ ස්වදේශ කටයුතු අමාත්‍ය සලාහුදීන් අහමඩ් මහතාගේ සෘජු නියෝගයක් මත මෙම සත්ත්වයා බිලි පූජාවෙන් නිදහස් කිරීමට පියවර ගෙන තිබේ.