ප්‍රවේශම්වන්න! ඔබගේ බැංකු ගිණුම හිස් කරන අලුත්ම ඩිජිටල් ජාවාරම ගැන පොලිසියෙන් රතු නිවේදනයක්!

ශ්‍රී ලංකාවේ ස්මාර්ට් ජංගම දුරකථන පරිශීලකයින් ඉලක්ක කර ගනිමින් ක්‍රියාත්මක වන ඉතා සූක්ෂ්ම ඩිජිටල් මූල්‍ය ජාවාරමක් පිළිබඳව තොරතුරු අනාවරණය කර ගැනීමට ශ්‍රී ලංකා පොලිසිය සමත්ව තිබේ. WhatsApp සහ Telegram වැනි සමාජ මාධ්‍ය ඔස්සේ පැමිණෙන සැකකටයුතු ගොනු (Files) හරහා ඔබේ බැංකු ගිණුමේ ඇති මුදල් සොරකම් කිරීමේ අවදානමක් පවතින බව පොලිසිය අවධාරණය කරයි.

මෙම ජාවාරමේදී ප්‍රධාන වශයෙන් භාවිත වන්නේ “.apk” (Android Package Kit) වර්ගයේ ගොනු වේ. සාමාන්‍යයෙන් මංගල ආරාධනා පත්‍ර, විදුලි බිල්පත් හෝ දිනුම් ඇදීම්වලට අදාළ තොරතුරු ලෙස පෙනී සිටිමින් මෙම ගොනු ඔබ වෙත එවන අතර, ඒවා රූපසටහනක් හෝ PDF එකක් යැයි සිතා Click කළ සැණින් ඔබේ දුරකථනයට මෘදුකාංගයක් (Mobile App) ලෙස ස්ථාපනය වේ.

මෙම අන්තරාදායක “apk” ගොනුවක් ඔබ ඩවුන්ලෝඩ් කර විවෘත කළහොත්, ඔබේ ජංගම දුරකථනයේ පාලනය සම්පූර්ණයෙන්ම හැකර්වරුන් අතට පත්වේ. ඒ ඔස්සේ ඔබගේ SMS පණිවිඩ කියවීමට ඔවුන්ට අවස්ථාව ලැබෙන අතර, බැංකු ගනුදෙනුවලදී අත්‍යවශ්‍ය වන රහසිගත OTP කේතයන් පවා ඔබ නොදැනුවත්වම හැකර්වරුන් අතට පත්වීමෙන් ඔබේ බැංකු ගිණුම් ඉතා පහසුවෙන් කොල්ලකෑමට ඔවුන්ට හැකියාව ලැබේ.

නාඳුනන අංකයකින් හෝ ඔබේ මිතුරෙකුගේ නමින් වුවද ලැබෙන මෙවැනි සැකකටයුතු “.apk” ගොනු කිසිවිටෙකත් විවෘත නොකරන ලෙස පොලිසිය මහජනතාවගෙන් ඉල්ලා සිටී. ඔබගේ දුරකථනයට අවශ්‍ය Apps ලබාගැනීමේදී සැමවිටම Google Play Store හෝ Apple App Store වැනි නිල මූලාශ්‍ර පමණක් භාවිත කිරීමත්, දුරකථන Settings තුළ ඇති “Install Unknown Apps” යන්න අක්‍රිය කර තැබීමත් ඉතා වැදගත් වේ.

යම් හෙයකින් ඔබ මෙවැනි වංචාවකට හසු වුවහොත්, ප්‍රමාද නොවී වහාම අදාළ බැංකුව අමතා ගිණුම් අත්හිටුවීමට පියවර ගන්න. අනතුරුව ළඟම ඇති පොලිස් ස්ථානයට හෝ අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසයට ඒ පිළිබඳව දැනුම් දෙන ලෙස ශ්‍රී ලංකා පොලිසිය වැඩිදුරටත් උපදෙස් දෙයි.