සියලු බන්ධනාගාරවල ජ්‍යේෂ්ඨ නිලධාරීන්ට හදිසි කැඳවීමක්

මීගමුව බන්ධනාගාරයේ ඇති වූ ප්‍රචණ්ඩකාරී තත්ත්වය සම්බන්ධයෙන් සාකච්ඡා කිරීම සහ අනෙකුත් බන්ධනාගාරවල මෙවැනි ගැටලුකාරී තත්ත්වයන් උද්ගත වීම වළක්වා ගැනීමට අවශ්‍ය පියවර ගැනීම සඳහා දිවයින පුරා පිහිටි සියලු බන්ධනාගාරවල ජ්‍යේෂ්ඨ නිලධාරීන් හෙට (08) පෙරවරු 7.30 වන විට විශේෂ රැස්වීමක් සඳහා කැඳවා තිබේ.

අධිකරණ සහ ජාතික ඒකාබද්ධතා අමාත්‍ය, නීතිඥ හර්ෂණ නානායක්කාර මහතා අද පාර්ලිමේන්තුවේදී අදහස් දක්වමින් මේ බව ප්‍රකාශ කළේය.

අමාත්‍යවරයා වැඩිදුරටත් සඳහන් කළේ මීගමුව බන්ධනාගාරයේ සිදුවීම සැලකිල්ලට ගෙන සමස්ත බන්ධනාගාර පද්ධතියේම ආරක්ෂාව තහවුරු කිරීම මෙම හදිසි රැස්වීමේ මූලික අරමුණ බවයි.