මීගමුව බන්ධනාගාරයේ ඩෙංගු වැළඳී රැඳවියන් මියගියාද? ඇමති නලින්දගෙන් ප්‍රකාශයක්

මීගමුව බන්ධනාගාරයේ රැඳවියන් 40කට පමණ ඩෙංගු රෝගය වැළඳී ඇති බවට සහ ඔවුන්ට ප්‍රමාණවත් ප්‍රතිකාර නොලැබෙන බවට සමාජය තුළ පැතිර යන චෝදනා සම්පූර්ණයෙන්ම අසත්‍ය බව කැබිනට් මාධ්‍ය ප්‍රකාශක, අමාත්‍ය නලින්ද ජයතිස්ස මහතා පවසනවා.

අද (07) පැවැති කැබිනට් තීරණ දැනුම්දීමේ ප්‍රවෘත්ති සාක්ච්ඡාවට එක්වෙමින් මාධ්‍යවේදියෙකු නැඟූ ප්‍රශ්නයකට පිළිතුරු දෙමින් අමාත්‍යවරයා මේ බව ප්‍රකාශ කළා.

එහිදී ඔහු කියා සිටියේ, බන්ධනාගාරය තුළ ඇති වී තිබෙන තත්ත්වය පිළිබඳව පැතිර යන කටකතා ප්‍රතික්ෂේප කරන බවයි.

“ඒ ප්‍රචාරය සම්පූර්ණයෙන්ම අසත්‍ය එකක්. ඩෙංගු හැදිලා 30ක් විතර මරණයට පත්වෙලා ඉන්නවා කියලා කියනවා නම්, ඒවට අදාළ මෘතදේහ තියෙන්න ඕනේනේ. ඒ නිසා ඒක සම්පූර්ණ අසත්‍ය කතාවක්.”

බන්ධනාගාරය තුළ සිටින ඕනෑම රෝගී රැඳවියෙකු වෙනුවෙන් අවශ්‍ය කරන වෛද්‍ය ප්‍රතිකාර උපරිමයෙන් ලබාදීමට පියවර ගෙන ඇති බවත්, ඒ සඳහා අවශ්‍ය වෛද්‍යවරුන් සහ සෞඛ්‍ය කාර්ය මණ්ඩලය බන්ධනාගාරය තුළ රඳවා ඇති බවත් අමාත්‍යවරයා සඳහන් කළා.

යම් හෙයකින් කිසියම් රැඳවියෙකුට උණ රෝගී තත්ත්වයක් පැවතියේ නම්, ඔවුන් සියලු දෙනාටම අවශ්‍ය කරන වෛද්‍ය ප්‍රතිකාර මේ වන විටත් නිසි පරිදි ලබා දී අවසන් බව ද ඔහු කියා සිටියා.

එහිදී වැඩිදුරටත් අදහස් දක්වමින් ඔහු සඳහන් කළේ,

“එක සම්පූර්ණයෙන්ම අසත්‍යයි. ඩෙංගු හැදිලා 30ක් මරණයට පත්වෙලා ඉන්නවා නම් ඒවා වල මෘතදේහ තියෙන්න ඕනේනේ. ඒක සම්පූර්ණ අසත්‍ය එකක්. ඕනෑම රෝගියෙකුට අවශ්‍ය කරන ප්‍රතිකාර ලබාදෙනවා. ඒකට අවශ්‍ය කරන වෙද්‍යවරු සහ කාර්‍ය මණ්ඩලය ඉන්නවා. කාටහරි උණ රෝගී තත්වය තිබ්බා නම් ඒකට අවශ්‍ය අරන ප්‍රතිකාර ලබාදීලා තියෙනවා.”