බදු ගැන ඇහෙන අලුත්ම පුවත

එළැඹෙන වසරේ සිට මෙරට බදු ක්‍රමය වඩාත් සරල සහ පහසු කිරීමට සැලසුම් කර ඇති බව ආර්ථික සංවර්ධන නියෝජ්‍ය අමාත්‍ය නිශාන්ත ජයවීර මහතා පවසයි.

ඒ අනුව රේගු බද්දට අමතරව අයකරන වෙනත් බදු ඉවත් කර ක්‍රමානුකූලව බදු සරල කිරීමට අවශ්‍ය වෙනස්කම් සිදුකරන අතර, අනිකුත් ආයතනවලට අදාළවද එවැනි සරල බදු ක්‍රම අය කරන බව නියෝජ්‍ය අමාත්‍යවරයා සඳහන් කළේය.

ඩිජිටල් අත්සන් සහ කඩදාසි රහිත රේගු ප්‍රකාශන ක්‍රමවේදය ක්‍රියාත්මක කිරීම නිල වශයෙන් ආරම්භ කිරීමේ අවස්ථාවට එක්වෙමින් ඔහු මේ බව කියා සිටියේය.

“ලබන වසරේදී අපේ බදු ක්‍රමය වඩාත් සරළ හා පහසු කිරීමට සැලසුම් කර තිබෙනවා. රේගු බද්දට අමතරව අය කරන වෙනත් බදු ඉවත් කර ක්‍රමානුකූලව බදු සරල කිරීමට අවශ්‍ය වෙනස්කම් සිදු කරනවා. අනෙකුත් ආයතනවලට ආදාළවත් එවැනි සරල ක්‍රම අනුගමනය කරනවා. තොරතුරු තාක්ෂණ පද්ධතිය ආයතනවලට බද්ධ කරගැනීම වේගවත් කරනවා. ඒ යන ගමනේ එක් සන්ධිස්ථානයක් ලෙස තමයි අද මේ ආරම්භ කරන ලද කඩදාසි රහිත රේගු ප්‍රකාශන ක්‍රමවේදය අපි දකින්නේ.”

මේ අතර, 2026 වසර සඳහා ශ්‍රී ලංකා රේගුව වෙත ලබාදුන් ආදායම් ඉලක්කය ආසන්නයට එම දෙපාර්තමේන්තුව පැමිණ ඇති බව ආර්ථික සංවර්ධන නියෝජ්‍ය අමාත්‍ය නිශාන්ත ජයවීර මහතා පවසයි.

“ජනාධිපතිතුමන් ඇතුළු නව රජයේ බලාපොරොත්තුව වෙන්නෙත් අපේ සියලුම රාජ්‍ය ආයතන සම්පූර්ණයෙන්ම යම්කිසි කාලසීමාවක් ඇතුළත ඩිජිටල්කරණයට ලක් කිරීම තමයි අපේ අවසාන බලාපොරොත්තුව. වෙනත් රටක ගත්තොත් විශේෂයෙන්ම ජාතික තනි කවුළුවක්, එහෙමත් නැත්නම් National Single Window එකක් තියෙනවා. ඒ National Single Window එකට ඒ රටේ ජනතාවට, ව්‍යාපාරිකයින්ට, වෙළෙඳ ප්‍රජාවට ඕනෑම කෙනෙකුට ප්‍රවේශ වෙලා තමන්ගේ සියලුම කටයුතු ඉටු කර ගැනීමේ හැකියාව තියෙනවා. ඉතින් අපිත් අන්න එතැනට යන ගමනක තමයි ඉන්නේ. ඒ යන ගමනට ගත්තු පියවරක් විදිහට තමයි මම මේක දකින්නේ. 2026 අවුරුද්දට ඔබට ලබා දීලා තියෙනවා රුපියල් බිලියන 2,207ක ඉලක්කයක්. මේ වෙනකොටත් රේගු දෙපාර්තමේන්තුව විදිහට ඒ ඉලක්කයේ ආසන්නයටම ළඟා වෙලා තියෙනවා. ඒ නිසා ආදායම් රැස්කිරීමේ යාන්ත්‍රණය ඉතාමත් විධිමත් වීම, ඒක ඉතාමත් සුභ ලකුණක්.”