මහවැලි ගඟ ආශ්‍රිත ප්‍රදේශ ගණනාවකට ගංවතුර තර්ජන

ඉදිරි පැය 48 තුළ මහවැලි ගඟ ආශ්‍රිත ප්‍රදේශ කිහිපයකට ගංවතුර තත්ත්වයක් ඇතිවිය හැකි බව වාරිමාර්ග දෙපාර්තමේන්තුව විසින් අනතුරු අඟවනවා.

පවතින අධික වර්ෂාපතනය හේතුවෙන් ගංගා ජල මට්ටම ඉහළ යාම මෙයට හේතුවී ඇති අතර, ඒ අනුව පහත සඳහන් ප්‍රාදේශීය ලේකම් කොට්ඨාසවල ජීවත්වන ජනතාව දැඩි අවධානයෙන් පසුවිය යුතු බවයි එම දෙපාර්තමේන්තුව පවසන්නේ.

අවදානමට ලක්විය හැකි ප්‍රදේශ වන්නේ කින්නියා, මූතූර්, කන්තලේ සහ සේරුවිල, වැලිකන්ද, ලංකාපුර, තමන්කඩුව, සහ දිඹුලාගල යන ප්‍රදේශයි.

එමෙන්ම මඩකලපුව පොළොන්නරුව මාර්ගය (ගල්ලැල්ල ප්‍රදේශය), සෝමාවතිය රජමහා විහාරයට පිවිසෙන මාර්ගය සහ සෝමාවතිය රජ මහා විහාරය අවට ප්‍රදේශ ජලයෙන් යටවීමේ අවදානමක් පවතින බවයි වාරිමාර්ග දෙපාර්තමේන්තුව වැඩිදුරටත් පවසා සිටින්නේ.