ඇමති ලාල්කාන්තගේ ප්‍රකාශයට සංඝරත්නයේ දැඩි විරෝධයක්

මහා සංඝරත්නයට නින්දිත සහ පහත් අයුරින් අපහාසාත්මක ප්‍රකාශ සිදුකළ අමාත්‍ය ලාල් කාන්ත මහතා සම්බන්ධයෙන් රජය නිසි පියවරක් නොගන්නේ නම්, එහි අනිටු විපාකවලට නුදුරේදීම මුහුණ දීමට සිදුවනු ඇතැයි ජාතික සංඝ සම්මේලනය අවධාරණය කරයි.

ඊයේ (12) මහනුවර, මඩවල ජනමංගලාරාම ජාත්‍යන්තර බෞද්ධ මධ්‍යස්ථානයේදී මාධ්‍ය හමුවක් කැඳවමින් එම සම්මේලනයේ සභාපති පූජ්‍ය ලියන්වල ශාසනරතන හිමියන් මෙම අදහස් පළ කළහ.

දේශපාලනඥයින් සහ මහා සංඝරත්නය අතර විවිධ මත ගැටුම් ඇති වූ අවස්ථා ඉතිහාසයේ තිබුණද, කිසිදු දේශපාලනඥයෙකු මෙවැනි වනචාරී සහ තුච්ඡ අයුරින් මහා සංඝරත්නය විවේචනය කර නොමැති බව ශාසනරතන හිමියෝ පෙන්වා දුන්හ.

එහිදී වැඩිදුරටත් අදහස් දැක්වූ උන්වහන්සේ මෙසේද පැවසූහ:

“රට කාබාසීනියා කරන කූඨ උපක්‍රමවලට අභියෝග කරන්න අපට අයිතියක් තියෙනවා. ලාල් කාන්ත මහතා කැලේ සතෙක් වගේ එළියට ඇවිල්ලා වනචාරී, පහත් ප්‍රකාශයක් කළා. අපි කියන්නේ කරුණාකරලා ඒ ප්‍රකාශය වහාම ඉල්ලා අස්කර ගන්න. එහෙම නොවුණොත් රට යන දිශාව ගැන අපට හිතාගන්න බැහැ.”

අදාළ අමාත්‍යවරයාගේ හැසිරීම පාලනය කරන ලෙස ජනාධිපතිවරයාගෙන් ඉල්ලා සිටි උන්වහන්සේ, එසේ නොමැති වුවහොත් ජනතාව ඉතා ඉක්මනින් මීට ප්‍රතිචාර දක්වනු ඇති බවද ප්‍රකාශ කළහ.