රජයෙන් ලබාදුන් රුපියල් මිලියනයක වන්දිය යළි පරිත්‍යාග කරමින් මනුෂ්‍යත්වය රජ කරවූ පුරවැසියන් දෙදෙනා

මෑතකදී බලපෑ ‘දිට්වා’ සුළි කුණාටුවෙන් සිදු වූ දේපළ හානි වෙනුවෙන් රජයෙන් පිරිනැමූ රුපියල් ලක්ෂ දහයක වන්දි මුදලක් නැවත රජයටම භාර දීමේ සුවිශේෂී පුවතක් මහව ප්‍රාදේශීය ලේකම් කාර්යාලයෙන් වාර්තා වේ.

මෙම ආදර්ශමත් ක්‍රියාව සිදු කර ඇත්තේ තමන්ට හිමි වූ රුපියල් ලක්ෂ පහ බැගින් වූ මුදල් ලබා ගැනීම ප්‍රතික්ෂේප කළ වයෝවෘද්ධ පුරවැසියන් දෙදෙනෙකු විසිනි.තමන්ට වඩා දැඩිව ආපදාවට ලක්ව අසරණ වූ වෙනත් පිරිසකගේ සුබසිද්ධිය උදෙසා එම මුදල් යොදවන ලෙස ඔවුහු බලධාරීන්ගෙන් ඉල්ලා සිටියහ.

මෙසේ මහත් මානුෂීය ගුණාංගයක් ප්‍රදර්ශනය කරමින් සිය වන්දි මුදල් අතහැරීමට තීරණය කර ඇත්තේ 152 මාකඩුවාව ප්‍රදේශයේ පදිංචි අසූ හැවිරිදි එච්.එම්.ඒ. රංබණ්ඩා සහ 169 මානිංගමුව ප්‍රදේශයේ පදිංචි අසූදෙහැවිරිදි ආර්.අයි.බී. ඩිංගිරි අම්මා යන දෙදෙනාය. අයහපත් කාලගුණය නිසා ඔවුන්ටද දේපළ හානි සිදුවී තිබූ අතර, ඒ වෙනුවෙන් රජය විසින් තක්සේරු කරන ලද ලක්ෂ පහක මුදල තමන්ට අනවශ්‍ය බව පවසමින් ඔවුන් ලිඛිතව ප්‍රාදේශීය ලේකම්වරයා වෙත දැනුම් දී තිබේ.

මෙම තීරණය ගැනීම සම්බන්ධයෙන් අදහස් දක්වා ඇති එම පරිත්‍යාගශීලීන් පෙන්වා දී ඇත්තේ, සුළි කුණාටුවෙන් තමන්ටද යම් බලපෑමක් එල්ල වුවත් නැවත නැඟී සිටීමට තරම් ශක්තියක් තමන් සතුව පවතින බවයි. මුලින් රජයෙන් ලබා දුන් රුපියල් විසිපන්දහසක අත්තිකාරම් මුදලින් තම නිවාසවල අත්‍යවශ්‍ය අලුත්වැඩියාවන් සිදු කරගත් බවද ඔවුහු පැවසූහ.

මුළු ජීවිතයම අහිමි වී කුසගින්නේ සිටින අන්ත අසරණ පිරිසක් සමාජයේ සිටින බැවින්, මහජනතාවගේ මුදල් වන මෙම රජයේ ප්‍රතිපාදන තමන්ට වඩා විපතට පත් වූවන් වෙනුවෙන් වැය කරන්නේ නම් එය තමන්ට මහත් සතුටක් බව ඔවුන් වැඩිදුරටත් අවධාරණය කර ඇත.