ජපාන මහ මැතිවරණයෙන් පාලක පක්ෂයට දැවැන්ත ජයක්

අග්‍රාමාත්‍ය සනයි තකයිචි මහත්මියගේ නායකත්වයෙන් යුත් ජපාන පාලක පක්ෂය එරට පැවැති මහ මැතිවරණයෙන් අතිවිශිෂ්ට ජයග්‍රහණයක් ලබා ගැනීමට සමත්ව තිබේ.

ඊයේ (08) පැවැති මෙම මැතිවරණයේදී පාලක ලිබරල් ඩිමොක්‍රටික් පක්ෂය (LDP) ප්‍රමුඛ සන්ධානය ජපාන නියෝජිත මන්ත්‍රී මණ්ඩලයේ බලය තහවුරු කරගත් බව විදෙස් මාධ්‍ය වාර්තා කරයි.

ජපාන නියෝජිත මන්ත්‍රී මණ්ඩලයේ පවතින මුළු ආසන 465 න් ආසන 352ක්ම දිනා ගැනීමට සනයි තකයිචිගේ සන්ධානය සමත්ව ඇත.

පසුගිය ඔක්තෝබර් මාසයේදී එවකට අග්‍රාමාත්‍ය ෂිගේරු ඉෂිබා මහතා ධුරයෙන් ඉල්ලා අස්වීමත් සමඟ, සනයි තකයිචි මහත්මිය ජපානයේ නව අග්‍රාමාත්‍යවරිය ලෙස වැඩභාර ගත්තාය.

අග්‍රාමාත්‍ය ධුරයට පත්ව මාස තුනක් වැනි කෙටි කාලයක් තුළ ඇය පාර්ලිමේන්තුව විසුරුවා හැරීමට පියවර ගත් අතර, මෙම මැතිවරණ ජයග්‍රහණයත් සමඟ ඇයගේ දේශපාලන ස්ථාවරත්වය තවදුරටත් ශක්තිමත් වී තිබේ.