අවුරුදු කෑම මේසයේ වියදමත් ඉහළට

සිංහල හා දෙමළ අලුත් අවුරුද්ද වෙනුවෙන් සකස් කරනු ලබන සාම්ප්‍රදායික කැවිලි මේසයේ වියදම පසුගිය වසරට සාපේක්ෂව මෙවර 7%කින් ඉහළ ගොස් ඇති බව වෙරිටේ රිසර්ච් (Verité Research) ආයතනය පවසයි.

එම ආයතනයේ දත්තවලට අනුව, පසුගිය වසරේදී සාමාන්‍ය පවුලක කැවිලි මේසය සඳහා රුපියල් 5,414ක මුදලක් වැය වී ඇති අතර එය මෙම වසරේදී රුපියල් 5,795 දක්වා ඉහළ ගොස් ඇත. මෙය රුපියල් 381ක ශුද්ධ වැඩිවීමකි. කැවිලි මේසය සඳහා අත්‍යවශ්‍ය වන කැවිලි වර්ග 8න් 6කම මිල ගණන් මෙලෙස ඉහළ ගොස් තිබීම විශේෂත්වයකි.

කැවිලි පිළියෙළ කිරීම සඳහා අවශ්‍ය වන අමුද්‍රව්‍යවල මිල ඉහළ යාම මෙලෙස පිරිවැය වැඩිවීමට සෘජුව බලපා ඇත. විශේෂයෙන්ම පොල්තෙල් සහ සහල් පිටි මිල ඉහළ යාම මෙම තත්ත්වයට ප්‍රධානතම හේතුව වී ඇති බව වෙරිටේ රිසර්ච් ආයතනය පෙන්වා දෙයි.

කොවිඩ් වසංගතය සහ ආර්ථික අර්බුදයට පෙර 2019 වසරේදී පැවති මිල ගණන් සමඟ සැසඳීමේදී, මෙවර කැවිලි මේසයක් සඳහා යන වියදම 2.5 ගුණයකින් පමණ ඉහළ ගොස් ඇති බව ද එම වාර්තාවේ වැඩිදුරටත් සඳහන් වේ.